Saturday, 31 August 2019

APNI SOCH SE APNA WAZAN KM KARAIN


Log aksar kehty hain k tambaku noshi tark karna mushkil hai. Latt tark karna aik mushkil cheez hai. Agar aap wazan kam karne ki koshish kar rahay hain to aap ko maloom hoga k yeh karna mushkil kamon mein se aik ho sakta hai.

Museebat yeh hai k jismani halaat ko chore kar wazan k masail aam tor par tarzay zindagi ki pasand ki taraf nahi atay hain. Kisi hadd taq aik tarzay zindagi aik nasha hai. Bator insaan hum un intekhabon ka intikhab karty hain jo asaan tareen hain. Fitrat mein hum usay har waqt dekhte hain, bijli hamesha mukhtasir tareen rasta ikhtiyar karti hai.

Bijli ke yeh aik achi cheez hai lekin jahan taq hamari sehat aur sehat k lehaaz se taiz tareen aur asaan tareen ikhtiyarat hamesha lainay ka behtareen intikhab nahi hota hai.

Hum mein se bohat se logon ne pehli baar werzish karna shuru kya hai, socha hai k" mein yeh kyun kar raha hon?". Jab hamari koshisho k nataij fori nahi hotay to hamaray paas is wajah se dastbardar honay ki kaamil wajah hoti hai.

Kya yeh aawaz aap ko waaqif hai? Bunyadi tor par hamaray dimagh hamein khush karne aur usay jaldi karne ke kosheh karte hain. Agar werzish aur sayhat mand zindagi guzarnay se lutaf andoz honay ki hesiyat se register nah ho to zeli shaoor wala dimagh aik behtar ikhtiyar k jo kaam karne ki zaroorat hai woh kere ga.

To sawal yeh hai k kon ikhtiyar (control) mein hai? Aap ya aap ka dimagh?

Aap apne dimagh main hain ya aap ka dimagh aap mein hai. Is ka jawab ho sakta hai, lekin yeh haqeeqat se daur hai. Hamara zeli dimagh hi woh hai jo la-shouri dimagh aur hamari jablaton, khwahisaat aur aadato ko janam deta hai. Yeh khushi ki talaash mein hai aur is ka assar-o-rasookh bohat mazboot hai.

Chahiye yeh k sabaq haasil karne k liye apni khushi ko kis terhan shikast di jaye. Apne ahdaaf k husool k liye apny aap ko yaksaa zehniat pasand logon se ghairna aik behtareen kaam kar sakta hain. Usay akailey mat karain.

Friday, 30 August 2019

PAK ARMY KAY DUSHMAN

Pakistan duniya ka wahid mulk hai jiski sab se bari active jungi sarhad hai jo kay 3600 kilometer hai aur bad-qismati se Pakistan hi duniya ka wahid mulk hai jo aik waqt me teen (3) khofnaak jungi doctrine ki zad mein hai jis kay barey mein bohat thoray log jantay hain aayiyae aaj zara uskay barey mein aapko batatay hain.

Pehlay number par Cold Start Doctrine hai jo indian jungi hikmat-e-amli hai jisskay liye india ki kul fouj ki saat (7) commands mein se chay (6) Pakistani sarhad par deployed ho chuki hain yeh india ki taqreeban assi (80) feesad se ziyada fouj banti hai aur is doctrine kay liye indian fouj ki mashqen, fouji naqal-o-hamal kay liye sarkon, pulon aur rilon linon ki taamer aur aslehay kay bohat barray barray depot nihayat taiz raftari se banaye ja rahay hain is doctrine kay tehat soobah-e-sindh mein jahan india ko geographyai geherai haasil hai woh taizi se daakhil hokar sindh ko Pakistan se kaatetay hue Balochistan Gawadar ki taraf barhain gy aur muqami tor par unko sindh mein JSQM aur Balochistan mein BLA ki madad haasil hogi. Pakistan ko asal aur sab se bara khatrah ise se hai aur Pak Army indian fouj ki isi naqal-o-harkat ko monitor karty huay apni jawabi hikmat-e-amli tayyar kar rahi hai. Aap ne suna hoga Pakistan Army ki "Azam-e-no" mashqon kay barey mein jo pichlay kuch saal se baqaidagi se jari hain. Yeh india ki cold start doctrine ka jawab tayyar kya ja raha hai jisskay tehat Pak Army jarehana difaa ki tayari kar rahi hai. Go kay is muamlay mein taaqat ka tawazun buri terhan hamaray khilaaf hai india ki kam-az-kam das (10) laakh fouj kay muqablay mein hamari sirf do (2) se dhai (2.5) laakh fouj dastiyaab hai baqi American “Af-Pak" doctrine ki zad mein hai.

American Af-Pak doctrine Obama administration ki jungi hikmat-e-amli hai Pakistan kay khilaaf jis kay tehat Afghan jung ko batadreej Pakistan kay andar le kar jana hai aur Pakistan mein Pak Army kay khilaaf goreela jung shuru krwani hai. Dar haqeeqat yahi woh doctrine hai jis kay tehat is waqt Pakistan ki kam-az-kam do (2) laakh fouji haalat-e-jung mein hain aur ab taq hum kam-az-kam apny bees (20) hazaar fouji jawanon ko Shaheed karwa chukay hain, jo Pakistan ki india kay sath lari jany wali teeno jangon mein shaheed honay walon ki majmoi tadaad se ziyada hai. Is jung kay liye America aur india ka aapas mein ittehaad hai aur israel ki technique madad haasil hai. Uskay liye kurram aur hangu mein shiah-suni fasadaat karwaye gaye aur waadi-e-sawat mein nafiz shariyat kay naam par aisay giroh ko musallat keya gaya jinhon-ne wahan awam par muzaalim dhaaye aur fasaad barpaa keya jis kay liye majaburan pehli baar Pak fouj ko unkay khilaaf un waadiyon mein daakhil hona para. Pak fouj ne amli tor par unko peechay dakhel diya lekin nazariyati tor par abhi bhi unko bohat se halqon ki bharpoor support haasil hai jiski wajah se awam apni army kay sath is terhan nahi khari jaisa hona chahiye aur uski wajah teesri jungi doctrine hai jis kay zariye America aur uskay ittihadi Pak Army par hamla-aawar hain usko Fourth Generation waar kaha jata hai.

Fourth Generation waar aik nihayat khatarnaak jungi hikmat-e-amli hai jisskay tehat mulk ki afwaaj aur awam mein mukhtalif tareeqon se doori paida ki jati hai, markazi hukoomaton ko kamzor keya jata hai, sobaaiyat ko hawa di jati hai, lasani aur maslaki fasadaat karwaye jatay hain, aur awam mein mukhtalif tareeqon se mayoosi aur zehni khalfeshar phelaya jata hai. Kisi bhi mulk ka media khareeda jata hai aur uskay zariye mulk mein khalfeshar, anarkii aur be-yakine ki kayfiyat paida ki jati hai. Fourth Generation waar ki madad se America ne pehlay Yugoslavia, Iraq aur Libya ka hashar kar diya ab is jungi hikmat-e-amli ko Pakistan aur Syria par aazmaaya ja raha hai aur bad-qismati se inhen is mein kaafi kamyabi haasil ho chuki hai. Pakistan kay khilaaf Fourth Generation waar kay liye bhi America, India aur Israel ittihadi hain Obama ne apny munh se kaha tha kay woh Pakistani media mein 50 million dollar salana (yearly) kharch karengy aaj taq kisi ne yeh sawal nahi uthaya kay kis maqsad kay liye aur kin ko yeh raqum ada ki jaygi jabkay india ka Pakistani media par asar-o-rsokh dekha ja sakta hai. Pakistan ki saari qoum is American Fourth Generation waar ki zad mein hai.

Yeh wahid jung hoti hai jiska jawab army nahi day sakti army is salahiyat se mehroom hoti hai. Chunkay Pak Army ko American Af-Pak Doctrine kay muqablay par nah adalaton ki madad haasil hai nah civil hukoomaton ki nah hi media ki, isliye bawajood be shumaar qurbaniyan dainay kay is jung ko ab taq khatam nahi kiya ja saka hai aur isko mukammal tor par jeeta bhi nahi ja sakta jab taq poori qoum mil kar is American Fourth Generation waar ka jawab nahi deti. Fourth Generation waar bunyadi tor par information waar hoti hai aur uska jawab civil hakoomaten aur media kay muhibbay-watan anasir dety hain. Pakistan mein lari janay wali is jung mein civil hukoomaton se koi umeed nahi isliye awam mein se har shakhs ko khud is jung mein amli tor par hissa lena hoga.

Is hamlay ka saada jawab yahi hai kay awam:

"Har is cheez ko radd kar day jo Pakistan or nazariya-e-Pakistan aur difaa-e-Pakistan ya qaumi salamti kay idaron par hamla aawar ho".

Thursday, 29 August 2019

BAY-EMAAN MUSALMAAN

Ajeeb haal hochuka hai hamara, khanay ko na milay to khudkushi krne lag jaty hain road per aakr khud ko aag lagane lagty hain paisay k bhookay hain hum, bhool gaye apny mazi ko 2 2 din bhooky rehne k bad bhi sara dyhaan ALLAH ke ibadat per hota tha kyun k unhain yaqeen tha k rizq dene wali zaat ALLAH ke hai agar zindagi likhi hui hai to rizq ka intezam bhi hojaye ga, or aaj Ibadat ka to pata nhe per dimagh me sirf paisa bhara hua hai k kese bhi terha zada se zada paisa aajaye, agar koi shaks ek waqt ka khana khata ho to isay qayamat samjha jata hai gareeb samjha jata hai,  aary bhool gaye apne NABI ALAY SALAM ko jo 3 3 din tk bhookay rehty thay or ise halaat me ALLAH se bhi jamilay.

Haye afsos is ummat ke soch or fikar per. Nojawan Islam ko chor kar degree k pechay bhag rahy hain goya k rizq deny wali zaat ALLAH nhe balkay degree hai, ALLAH maaf karay aesi soch per hamari. Asal baat to ye hai k hm samajhna he nhe chahty, hum sirf apni marzi chahty hain ALLAH ke nhe, apni marzi ka Islam apni marzi ke zindagi, apni marzi ka rizq.

Ye asal zindagi nhe jo soch rakhi hai humne apny liye, jo aaj ka naam ka Musalman apny liye sochta hai.

Maa baap ke qul fikar he aulad ka dunyavi mustakbil or taleem hai. Deeni taleem or Aakharat k mustakbil ke koi fikar nhe, bohat he afsos ke baat hai ye agar samajh me aajaye to.

ALLAH is quam ko aqual de dy, tujhe tere Pak hone ka wastaa is quam ko asal Emaan ke dolat se nawaz dy. Aameen

MUSALMAN AURAT OR KUFRIYA ZUBAN

Aaj kal dekha jaye to hamari aurtain zadater films or dramas dekh dekh kr unhe ke zuban bolne lagi hain ye in filmon or dramon me kam karne waly zadater deen se bezaar log hoty hain ya wo log hain jinhain hum Islam ke zuban me munafiqeen kehtay hain jo samne to bary deen dar or Musalman ban kr aaty hain magar haqeeqat me wo sirf Islam k nam per kufur ke soch ko phela rahy hain. Maslan Islam me parday ka hukum hai to ye log kafir ke zuban bolty hain or kehty hain parda to dil ka hona chahye, ye maaz ALLAH indirectly Khuda ko bata rahy hoty hain k hamain zahri parday ke zarurat nhe. ise terha aurat ko libaas k hawalay se kaha jaye k munasib libaas pehno to agay se jawab aata hai "meri marzi jo bhi pehnon". Kia is terha k alfaaz ka ada karna ALLAH k hukum ke toheen nhe hai? Is terha k fazool jumlay sikha sikha kar Musalman aurat ke zuban per kafir aurat k alfaaz or aik Musalman aurat ke soch ko badal kar kafir aurat ke soch me tabdil kardia gaya hai.

Islam k dushman haqeeqat me Islami taleemaat ka mazaq uratay hain. Fitna phelane waly ye log nay nay alfaaz or jumlay eejaad kar k is ummat k aquaid ko kharab karne ke kosheh kar rahy hain. Isi terha agar dekha jaye to dramon me jasbaati batain kar k logon ko Islam k asal haqaiq se door rakh kr galat maloomat farham kartay hai. Zadater aurtain drama dekhti hain ise leye wo sb se zada is fitnay ka shikaar horahe hain. Agar Islam k kese hukum per amal karna itna he bojh lagta hai to km se km usay defend to naa karain apne dil per bojh rakh kr he wo kaam karlen, Emaan ka sb se kamzoor tareen darja he yehe hai k insaan burai or galat kaam ko dil se bura jaany, magar yahan masla ye hai k burai ko waqt ke zarurat or achai bana dia gaya hai or haqeeqat me yehe fitna hai jis ka shikaar hamari aurtain horahi hain. Jb burai or nafarmani ko waqt ke zarurat sasmjha jaye to phir toba kesy mumkin hogi? Jb aik aurat burai ko burai he naa samjhay balkay usay waqt ke zarurat samjhay to phir wo apne fail per sharminda kesy hogi or kesy ALLAH se toba kary ge?

Sochne ke zarurat hai

Tuesday, 27 August 2019

KHAMOSHI EK ZULM


Qanoon ki class mein ustaad ne aik taalib-e-ilm ko khara kar k us ka naam poocha aur baghair kisi wajah k ussay class se nikaal diya. Talib-e-ilm ne wajah jan-nay aur apne difaa mein kayi daleelen dainay ki koshish ki magar ustad ne aik bhi nah suni aur apne faislay par qaim raha. Talib-e-ilm shakista dili se bahar to nikal gaya magar woh apne sath honay wali zayad-ti ko zulm jaissa samajh raha tha. Hairat baqi talba par thi jo sir jukaye aur khamosh baithy they.

Lecture dainay ka aaghaz karty huay ustaad ne talba se poocha k qanoon kyun banaye jatay hain? Aik taalib-e-ilm ne kharray hokar kaha k logon kay rawaiyon par qaboo rakhnay kay liye. Dosray taalib-e-ilm ne kaha k muashray par laago karne kay liye.
Teesray ne kaha taakay koi taqatwar kamzor par zayad-ti nah kar sakay.

Ustaad ne kayi aik jawabaat sunney kay baad kaha k yeh sab jawabaat theek to hain magar kaafi nahi hain.

Aik taalib-e-ilm ne kharray ho kar kaha k taakay adal-o-insaaf qaim keya ja sakay.

Ustaad ne kaha k bilkul yahi jawab hai jo mein sunna chahta tha, taakay Adal ko ghalib keya ja sakay.

Ustaad ne phir poocha k adal aur insaaf ka kya faida hota hai?

Aik taalib-e-ilm ne jawab diya k taakay logon kay haqooq ki hifazat ki ja sakay aur koi kisi par zulm nah kar sakay.

Is baar ustaad ne aik tawaquf kay baad kaha k acha, mujh se daray baghair aur bulaa jhijhak meri aik baat ka jawab do, kya mein ne tumhare saathi talib-e-ilm ko class room se nikaal kar koi zulm ya zayad-ti ki hai?

Saaray talba ne yak zabaan jawab dia k jee haan sir, aap ne zayad-ti ki hai.

Is baar ustaad ne ghussay se ouncha boltay huay kaha k theek hai kay zulm hua hai, phir tum sab khamosh kyun baithy rahay? Kya faida aisay qawaneen ka jin kay nifaz kay liye kisi kay andar himmat aur jurrat hi nah ho?

Jab tumhare saathi talib-e-ilm kay sath zayad-ti ho rahi thi aur tum is par khamosh baithy they, is ka bas aik hi matlab tha kay tum apni insaaniyat khoye baithy they, aur yaad rakho jab insaaniyat girti hai to is ka koi bhi nem-o-badal nahi hua karta.

Is kay sath hi ustaad ne kamray se bahar kharray huay taalib-e-ilm ko wapas andar bulaya, sab kay samnay is se apni zayad-ti ki maafi mangi, aur baqi talba ki taraf apna rukh karty huay kaha k yahi tumhara aaj ka sabaq hai, aur jao, ja kar muashray mein aisi na-insafiyan talaash karo aur un ki islaah kay liye qanoon nafiz karanay kay tareeqay socho.

Monday, 26 August 2019

ELECTION COMMISSION KAY DHOKAY

Farz karen mere halqay se teen (3) mukhtalif siyasi jamaaton k umeed waar hissa le rahay hon aur un ka kirdaar aisa ho k mein un mein se kisi aik ko bhi vote dena pasand nah karoon. Is soorat mein mujhe kya karna chahiye?

Kya riyasat ny mujhe koi option day rakha hai ya mere paas is k ilawa aur koi rasta nahi, ya to mein kisi aik ko vote day kar apna numainda bana lon ya phir be-basi se is saaray muamlay se lataaluq ho kar ghar baitha rahon.

Election commission ny 2013 kay intikhabaat se pehlay is sawal par ghor-o-fikar kar kay is ka hal nikala tha kay hum ballet paper mein aik izafi khanah muta-arif karanay ja rahay hain.

Sher, ballay, crane, cycle, kitaab aur teer waghera kay intikhabi nishaan kay sath sath hum logon ko yeh option bhi day rahay hain kay woh chahain to un mein se kisi ko bhi vote nah den.

Ballet paper mein aik izafi khanah ho ga jis mein likha ho ga kay mein in tamam umeedwaran mein se kisi aik ko bhi is qabil nahi samjhta kay vote doun.

Is khanaay mein NOTA likha ho ga yani “None Of The Above.”

Election commission ny tajweez di kay agar 51 feesad ya is se ziyada vote NOTA ko mil gaye to election kaladam tasawwur ho ga.

Election commission ny ittafaq-e-raye se yeh maamla wazeer-e-azam ko bhaij diya kay woh usay manzoor kar kay sadder-e-Pakistan ko bhejen aur sadder-e-Pakistan aik ordnance kay zariye usay nafiz kar den.

Jab yeh summary wazeer-e-azam house pohanchi to wahan sukut-e-marg taari ho gaya. Maamla yun daba diya gaya kay yeh talk shows aur kalmon ka mauzo taq nah ban saka. Kaghzat-e-namzadgi mein tarmeem kay muamlay par jis terhan sab ny chupkay chupkay ittafaq kar liya isi terhan yahan bhi sab ny chupkay chupkay tey kar liya kay voter ko itni azaadi nah do kay hamaray liye museebat khari ho jaye.

Chunancha yahi tey paaya k NOTA ka khanah ballet paper mein nahi ho ga. Election commission ny bhi kamaal farmabardari ka muzahira karte hue apni tajweez ko aik gunah samajh kar bhula diya. Nah woh is tajweez ko awam kay samnay laya or nah hi is ny supreme court se rujoo karne ki koshish ki kay janab hum ny yeh tajweez di hai magar hukoomat ny usay andhay kunvey mein daal diya hai to aap se istadaa hai is par munasib hukum jari farmayen.

Election commission aaj bhi siyasat danon ki farmabardariyon mein laga hua hai aur taaza tareen faisla yeh hai kay supreme court kay hukum par umeedwaraan se kaghzat-e-namzadgi kay sath jo bayan-e-halfi liya jaye ga usay website par nahi dala jaye ga. Balkay poora ihtimaam kya jaye ga kay awam ki is par nazar nah paray.

Ab aai-ye is pehlu ki janib kay election commission ny NOTA ki yeh tajweez kyun di thi?

Is ki teen wajohaat theen. Pehli wajah yeh thi kay is soorat mein turn out barhta aur logon ki aksariyat jo lataluq ho kar ghar baith jati hai woh ghar se nikalti aur aakar kayhti kay in mein se koi umeed waar hamein qubool nahi.
Doosri wajah yeh thi kay jab siyasi qayadat ko maloom hota kay awam kay paas ab NOTA ka option mojood hai to woh tickets ki taqseem kay waqt ziyada mohtaat ho kar faislay karty aur nisbatan behtar umeedwaran maidan mein utaarey jatay.
Teesri wajah yeh thi kay agar log bhaari tadaad mein vote daalnay aatay to is se jaali vote daalnay ka amal ruk jata ya intahai kam ho jata. Kyun kay dekha yeh gaya hai kay jo log vote daalnay nahi atay un kay jaali vote dal diye jatay hain.

Yeh tajweez koi anokhi tajweez nahi thi. Duniya kay bohat se mumalik mein NOTA muta-arif karaya ja chuka hai.

Columbia, Ukraine, Brazil, Finland, Spain, Sweden, Chili, France , Belgium, America ki baaz reyaston aur hatta kay Bangladesh aur Bharat mein yeh option mukhtalif shaklon mein mojood hai.

Bharat mein election commission ne usay muta-arif karana chaha to hukoomat ne yeh tajweez radd kari. Chunancha maamla supreme court taq ja pouncha aur supreme court ne election commission ko hukum day diya kay woh is option ko ballet paper mein shaamil karly. Chunancha 2014 kay aam intikhabaat mein saath laakh (6000000) voters ne NOTA par mohar lagai.

Bharat mein maamla supreme court taq ja sakta hai to Pakistan mein kyun nahi ja sakta?


Election kay hungamon mein qoum ko yeh aqval-e-zareen to sunaye jatay hain kay vote zaroor daliye aur aik zimmedaar shehri honay ka saboot degiye lekin is sawal ka jawab kon day ga kay agar koi aadmi kisi bhi umeed waar ko vote nah dena chahay ya wo kese bhi umeedwaar ko vote k qabil he naa samjhay to is kay paas kya option ho ga?

Vote daalna agar awam ka aaeni haq hai to kya NOTA ka option un kay bunyadi jamhoori haqooq mein shaamil nahi hai? Kya is jabar ka koi jawaz hai kay awam kay option ko mehdood kardia jaye is so called jamhoori nizaam me?

Hamaray haan ghaliban yeh tey kar liya gaya kay qanoon saazi sirf baladast tabqaat kay mafaad mein ki jaye gi. Is tabqay ka mafaad ho ga to parliament mein sab mil kar kaghzat-e-namzadgi mein waardaat daal den ge aur is tabqay kay mafaad ka taqaza ho ga to supreme court kay hukum kay baad majaboori kay aalam mein un se bayan-e-halfi to le liya jaye ga lekin usay website par nahi dala jaye ga. Taakay voter un ki waardaat se be khabar rahay. Hamaray intikhabi qawaneen isi baladast tabqay kay mafadaat ka tahaffuz kar rahay hain.


Is se bara tamasha kya ho sakta hai kay aik aam voter par pabandi hai kay woh sirf aik halqay se vote daal sakta hai lekin baladast tabqay ko azaadi hai woh chahay to paanch halqon se election mein hissa le le. Aik se ziyada halqay se jeetnay kay baad woh aik halqa paas rakh kar baqi halqay chore day aur qarzay mein jakri ghareeb qoum is anokhay ladly kay chorey huay halqay mein phir se qaumi wasail jhonk day aur zimni intikhab kurwaye.

Kya election commission ko ehsas hai kay kisi halqay ka zimni election qoum ko kitney mein parta hai? Intikhabi amlay ki duty lagti hai, police aur rangers tainaat hoti hain, ballet papers chaptay hain, muqami tateel karna parhte hai, lakhoon log aik baar phir polling station ka rukh karty hain. Rehnuma ka masla to samajh mein aata hai. Usay khauf ho sakta hai haar nah jaye is liye aik se ziyada halqon se hissa laita hai. Ho sakta hai woh saabit karna chahta ho mein bara maqbool hon paanch halqon se kamyaab hua hun. Yeh bhi ho sakta hai kay woh kisi halqay mein ticket ka faisla nah kar saka ho aur party ko taqseem se bachanay kay liye khud umeed waar ban betha ho. Lekin is sab ki saza awam ko kyun di jaye?

Bharat mein bhi pehlay aisa hi tha kay jo jitnay halqon se chahay intikhabaat mein hissa le sakta hai. Phir wahan awaami numaindagi act ki dafaa 33 mein tarmeem ki gayi kay aik aadmi do se ziyada halqon se umeed waar nahi ban sakta. Aur ab 2019 kay intikhabaat kay liye bharti election commission ne supreme court se rujoo kar liya hai kay aik aadmi ko sirf aik halqay se election mein hissa lainay ki ijazat honi chahiye. Bharat ka election commission yeh sab kar sakta hai to hamara election commission kyun nahi kar sakta?

Bohat se deegar raastay bhi mojood hain. Kisi kay jeetnay kay baad halqa chornay ki soorat mein dosray number par anay walay ko bhi kamyaab qarar diya ja sakta hai aur yeh bhi ho sakta hai kay is soorat mein zimni intikhabaat kay tamam akhrajaat bashamool wahan tainaat ehalkaron ki kam-az-kam aik din ki thankhowa is umeed waar se wusool ke jaye jis kay halqa chornay ki wajah se zimni election karwana parry.

Intikhabi qawaneen mein koi islaah to kiijiye. Yeh mulk chand siyasi rehnumao ki charagah to nahi kay hum apne wasail aur qaumi khazana un anokhay ladlon kay adventure kay liye barbaad karwatay rahen.

Sawal yeh hai kay election commission kahan hai? Woh aik azad idaara hai ya chand siyasi shaksiyat ke malkiyat?

Aap ke raaye kay muntazir.

Sunday, 25 August 2019

SIYASAT OR HAQEEQAT

"Aik shakhs ne douran-e-safar mehakma-e-railway ke shekayati markaz ko sms kya:''Rail k andar baqi sahuliyaat to chalein jaisi bhi hain hum guzara kar hi letay hain lekin baraye meharbani baath rooms mein rakhay loton ki zanjeeroon ki lambai kam-az-kam itni to rakhen k lota manzil-e-maqsood taq ba'aasani pohunch jaye."

Railway ki taraf se jawab aaya:

''Zanjeer se lota bandha hai aap nahi. Agar takleef hai to apni manzil-e-maqsood ko khiska kar lautay kay qareeb kar len."

Chalay to they naya Pakistan bananay magar adhay rastay mein pata chala k loton k baghair wazeer-e-azam ban-na mumkin nahi to ab apni manzil-e-maqsood ko khiska kar un loton k qareeb le gaye hain jo 'Electables' k naam se jane jatay hain.


Ye to the aik misaal jo yahan samjhai gai hai. system ko thek karna itna aasan nhe jitna ye siyasat daan hamain bata bata kar vote hasil karne ke kosheh karty hain. Aap ALLAH se jang ke halat me kabhi bhi system ko thek nhe karsakty, jis qism k halaat is waqt mulk-e-Pakistan k hain is se sirf ALLAH ke Pak zaat he hamain nikal sakti hai, magar hamne soodi nizaam k zarye se ALLAH ko bhi naraz kar rakha hai.

Islam k naam per jo dhoka dia jata hai wo bhi kese se dhaka chupa nhe hai, Islam ke bat kar k ger Islami fail to is mulk me ab aam bat hogai hai, Assembliyan har us bil ko mustarad kar deti hain jis se Islam ka pehlo ojagar hota ho, or Islam k khilaaf har bill din ba din pass hoty jaarahy hain. Natija ye nikla k aaj is mulk me choori hoti hai per chor k haat nhe kaaty jaty, zina aam hai per kese ko is ke saza nhe milti, qatil jail me aish-o-aaram ke zindagi guzar rahy hain. Jb qanoon ka ye haal hoga to phir kon is mulk me be-emani se baaz aye gaa? Aik chokidaar se le kar mulk k bary bary siyasat daanon tk corrupt log mojood hain or chalay hain system to thek karne. System ko thek karna hai to pehle Islam ko sahi terha nafiz karain.

Jb sazayen foran milna shuru hojayen ge tb system bhi khud-ba-khud thek hona shuru hojaye ga. Chor kay jb haat katain gy to koi choori karny ke jurrat nhe karay ga. zara pakar kar jailon me band to karain chor siyasat daanon ko, do (2) chaar (4) k haat kat kar to dekhain, khud-ba-khud mulk ka loota hua paisa wapis aana shuru hojaye ga. Magar ye kon karay ga jab haat kaatnay wala khud he chor ho?

Saturday, 24 August 2019

SEX OR 5th GENERATION WAAR


Europe jis sex education aur jis jahannum k garhay ki taraf hamaray schools colleges aur universities ko dhakel raha hai uskay baray mein hamain fikar karni chahye privacy k bawajood mukhtalif websites per bhi sex education k adds ana shuru hogaye hain.

Pakistan me porn videos jis terha aam hain or ktne aasani k sat in tak rasai hasil ke jaasakti hain, ye hamary leye lamha-e-fikeria hai jo din ba din hamari nojawan nasal ko busdil banati jarahi hai.

Hamari quam ka 60 feesad nojawanon par mushtamil hai or duniya-e-kufar is qoum ko badnaam karne pay muttahid ho chuke hai.

Yeh un ka 5th generation waar ka aik harba hai.


Xvideos Kay Muashray Par Asraat:

(1) Be-aulaad afraad ka barh jana.

(2) Dimaghi cancer ka hojana.

(3) Talaq ka barh jana.

(4) Musbat soch ka khatam ho jana.

(5) Km umri mein baaligh ho jana.

Is k ilawah nafsiyati or chirchira pan or mardon me gussa or aurat se nafrat ka barh jana.
Hum jab social media ke zariye dam banava satke hain, load tax khatam karwa satke hain, zainab ko insaaf dilwa satke hain, social media par pak fouj k khilaaf dunya-e-kufar ki chalne wali muhim band karwa sakty hain, to hum tamam porn site Pakistan mein hamesha k liye band karwa saktay hain, aaj se pehlay is cheez ko Sultan Salah Uddin Ayubi ny mukammal band kya tha,

QURAN pak mein irshad hai jis ka mafhuum hai:

Tum jin ki mushaabiat ikhtiyar karo gy unhi k sath shumaar kiye jao gy.

Kya pata aap ka aik forward aap ko Sultan ka sipahi bana day. Hamara maqsad tamam porn site par hamesha k liye pabandi aid karna hai.


Block All Sex Websites In Pakistan:

Hum log har roz 24 ghantay mobile sara sara din istemaal karty hain aaj is kaam k liye bhi istemaal karo, logon ko burai se roko ye hamara mazhabi fariza bhi hai or zarurat bhi.

Imran Khan sahib se bhi darkhawst hai k aaj hamaray mulk ko sab se ziada is tabdeeli ki zaroorat hai, saaray nojawanon ki taraf se aap se appeal ki ja rahi hai k tamam gandi websites Pakistan mein band Karen. Whatsapp, imo,
twitter, facebook or degar social media sites per is ko roka jaye. Aao mil kar ye kaam karain or apni nasal k mustaqbil ko sanwarain.

“Pakistan ko gandagi se pak Karen.”

Ye message facebook ki har id par zaroor hona chahiye.

Friday, 23 August 2019

TERBIYAT KE KAMI


Guzay zamano mai jb bacha apne ghar se bahir doston k sat kheltay huay agar koi galti karta ya doston se ghagraa karta ya kese baray k sat bad-tameezi karta to mohallay ka koi bhi bara ya buzurg usay rooktay ya us ke galti ke saza dety or naa sudharnay per thapar bhi raseed detay, bacha agar ghar aa kar apne walid se shekaiyat karta to walid se mazeed thapar khata. Ye saza is baat ke alamat hoti k usay andaza hojaye k jo galat kaam usne keya hai wo sb k nazdeeq galat hai, is se bachon ko apni galti ka aehsaas hota hai.

Aaj ka bunyadi masla ye hai k bacha bahir agar kese baray se badtameezi bhi karay or wo usay dantay ya maray to walid sahab khud badla lene pohunch jaaty hain k us k bachay per kyun ghussa keya, natijaa ye nikalta hai k bacha aur bhi sher hojata hai usay andaza he nhe hota k wo kitna galat hai or phir bara ho kar wo apne baap ko usi terha aakhain dekhata hai.

Jab bachpan me he galtiyon per saza naa milay to jawani me samjhaana bekaar hai.

Is leye kosheh karain k apne bachon ke achi terbiyat un k bachpan me he karain or dusron ko bhi is me shamil rakhain k wo bhi aap k bachay ko agar bura kartay dekhain to usay is baat ke saza dain, aaj hamary paas khud to waqt nhe or naa he aaj kal ke maayen bachon ke terbiyat me koi dilchspi leti hain, ulta bacha agar bahir kese se dant kha kar aye to bachay k baap se shekiyat karti hain. Agar hamary mashray ka yehe silsala raha to bohat jald europe ke terha hamary ghar k buzurg maa baap apni zindagi k aakhri aiyaam ghar k bajaye old house me guzarain gy.

Thursday, 22 August 2019

MAZI KA DOUR

Guzraa Zamana:


Aik daur tha jab master agar bachay ko maarta tha to bacha ghar aakar apne baap ko nahi batata tha k us ke bezati hogi, aur agar batata tha to baap usay aik aur thapar raseed kardaita tha.

Yeh woh daur tha jab Academy ka koi tasawwur nah tha, tuition parhnay walay bachay nikammay shumaar hotay they.

Baray bhaieyon k kapray chootey bhaieyon k istemaal mein atay they aur yeh koi mayoob baat nahi samjhi jati thi.

Larai k mauqa par koi hathyaar nahi nkalta tha, sirf itna kehna kaafi hota tha k mein tumharay abba jee se shikayat karoon ga. Yeh suntay hi aksar mukhalif fareeq ka khoon khushk hojata tha.

Uss waqt k abaji bhi kamaal k they, subah saweray fajar k waqt karaq dar aawaz mein sab ko Namaz k liye utha diya karty they. Ibaadaten har ghar ka mamool theen.

Kisi ghar mein mehmaan aajata to ird gird k hamsaye uss ghar ko daikhnay lagtay aur farmayshin ki jatein k mehmanon ko hamaray ghar bhi le kar ayen.

Jis din mehmaan nay rukhsat hona hota tha, saaray ghar walon ki aankhon mein udasi k ansoo hotay they, mehmaan jatay hue kisi chootey bachay ko das rupay ka note pakrane ki koshish karta to poora ghar is par ehtijaj karty hue note wapas karne mein lag jata, taham mehmaan bhi har soorat yeh note day kar hi jata.

Shadiyon mein sara mohalla shareek hota tha, khushi ghami mein anay jaaney k liye aik jora kapron ka alehda se rakha jata tha jo isi mauqa par istemaal mein laya jata tha, jis ghar mein shadi hoti thi un k mehmaan aksar muhallay k deegar gharon mein thehraaye jatay they, muhallay ki jis larki ki shadi hoti thi baad mein poora mohalla baari baari miyan biwi ki dawat karta tha.

Kabhi kisi nay apna aqeedah kisi par thopne ki koshish nahi ki, kabhi kafir kafir k naaray nahi lagey, sab ka rona hansna sanjha tha, sab k dukh aik jaisay they.

Sab ghareeb they, sab khushaal they. Sb ek dusray ke madad kartay thay kese ko koi pareshani naa the kyun k hamdard he itny thay.

Dokandaar ko khota sikka de dena hi sab se bara fraud hota tha?

Kash phir woh din lout ayen, magar naa mumkin hai ya bohat mushkil hai. Khud ko badalna pary ga.

Zamana Badal Gaya Ya Badlaa Gaya:

Ab zamana badal gaya hai magar kaisay, sirf-o-sirf media k zariye se. In filmon dramon ne aaty he hamary ghar k mahool ko tabdeel kardia hai. Fazool rasam-o-riwaj ko farogh de kar hamain fazool kharch bana dia gaya jis ke waja se hum bachat km or kharcha zada karty hain. Jis terha se brain washing ke gai hai log samajhne se qasir hain, khud kehtay hain k pehle aesa nhe hota tha, to bhaiyon behno ab kyun horaha hai kon hai is k pechay jo aap k ghar k mahool ko badal raha hai. In filmon dramon k zariye se nafrat ko phelaya jaata hai, nafrat aamaiz jumlay kahay jaaty hain betiyan apne maa baap se kaleja chalnee karne waly jumlay kehti hain or unhain positive bana kar dekhaya jaata hai. Afsos to is baat ka hai k hum dekh bhi rahay hoty hain magar hamain andaza nhe hota k is ka hamary bachon k zehno per kia asar pary ga. Is k ilawaa maar dhaar to bharpoor tariqay se dekhai jaati hai, or be-hayai ka to kia he kehnaa.

Shaitaan to har waqt aap per or aap k bachon per hamlay kar raha hai, magar aap apnay or apnay bachon k difa me ek dafa bhi kuch nhe kar rahay, aap ke tawajja shaitan k hamlon ke terf nhe jaati. Yehi asal waja hai zamana badalne ke.

Mukhtasir mai yehi kehna chahunga kay:

“Zamana badla nhe zamanay ko badlaa gaya hai.”

Zara Sochiye...!

Wednesday, 21 August 2019

CHOOHAY KE BAAT OR YEMEN KASHMIR KA HAAL


Aik choha kisaan k ghar mein bill bana kar rehta tha, aik din choohay neh dekha k kisaan aur uss ki biwi aik thelay se kuch nikaal rahay hain, choohay neh socha k shayad kuch khanay ka samaan hai. Khoob ghor se dekhnay par uss neh paaya k woh aik choohay daani thi. Khatrah bhapnay par uss neh ghar me mojood kabootarr ko yeh baat batayi k ghar mein choohay daani aa gayi hai. Kabootarr neh mazaq uratay hue kaha k mujhe kya? Mujhe kon sa iss mein phansna hai. Mayoos choha yeh baat Murgh ko batanay gaya. Murgh neh mazaq uratay hue kaha k ja bhai ja apna kaam kar, yeh mera masla nahi hai. Mayoos choohay neh deewar paar ja kar bakray ko yeh baat batayi, aur bakra hanstay hanstay lُot poat honay laga.

Usi raat choohay daani mein khatak ki aawaz aaye, jis mein aik zahreela saanp phas gaya tha. Andheray mein uss ki dum ko chooha samajh kar kisaan ki biwi neh uss ko nikala aur saanp neh ussay duss liya. Tabiyat bighrnay par kisaan neh hakeem ko bulwaya, hakeem neh ussay kabootarr ka soop pilanay ka mahswara diya. Kabootarr abhi bartan mein ubal raha tha k khabar sun kar kisaan k kayi rishta-daar milnay aa puhanche jin k khanay k intizam k liye aglay din Murgh ko zibah keya gaya. Kُuch dinon k baad kisaan ki biwi mar gayi. Janaza aur taaziyat k leye aanay waly logon k leye bakra halal karne k ilawa koi charah nah tha.

Chooha door ja chuka tha or usay kuch kahabar na the.

Agli baar koi aap ko apna masla bataye, aur aap ko lagey k yeh aap ka masla nahi hai to intzaar kejiye ga dobarah sochye ga.


Hum Sab Khatray Mein Hain:

Dour-e-hazir mein Palestine ka masla ummat-e-Musalmah ka pehla masla hai, ummat-e-Musalmah ka aik hissa, is badan ka aik hissa sab musalman mumalik yehi bolen. Aik musalman mulk par qabza karliya gaya zulm k pahar dhaye gaye, sab neh yahi kaha yeh hamara masla nahi hai, kisi neh kaha Arabon ka masla hai, kisi neh kaha aik maslak ka masla hai kisi neh kuch aur kisi neh kuch. Khatray mein thi to poori magar sirf aik hi shakhsiyat neh is khatray se ummat-e-Musalmah ko aagah kiya, youm-ul-Quds aik ehtijaj tha is anay walay khatray se aagahi ka zareya tha phir aik aik karkay sab qurbaan honay lagey, Iraq , Kuwait, Iran , Shaam, Libya, Bahrain, Kashmir aur Yemen. Yemen jis ki bohat ziyada rivayet hain, NABI PAK neh pehlay hi hujjat tamam kar di thi, ab bhi ghaafil baithy rahay, ab bhi maslay ko nah samjha, ab bhi ehtijaj nah keya, ab bhi apna wazifa ada nah keya to hooshiyar ho jaien kabootarr, murghi, bakra ban'nay k liye woh waqt door nahi hoga jab hamari baari aeye gi, to zulm k khilaaf ehtijaj karen, baidar ho jaien, niklen, khawab-e-ghaflat se baidar ho jaien, kahin aisa nah ho be basi se qurbaan ho jaien darpook aur buzdilon ki terhan.


To Phir Hum Kya Karen?

Yemen ke mojooda halaat mein hum sab ka farz hai k sb se pehle hum Yemen k baray mein aagahi haasil karain phir apne halqa-e-ahbaab mein har mumkin tareeqay se Yemenis ki mazlomiyat aur zalim Alliance ko wazeh tor par zahir karain, jis behtar tareeqy se bhi yeh kaam mumkin hosakay:

1. Internet se tasweerain (photos) share karain.

2. Mukhtalif qisam ki videos jo urdu mein banai jarahi hain unko nashar karnain.

3. Logon ko guftugu mein haqayiq se aagahi farahm karain.

5. Kashmir aur Yemen ki mazlomiyat dono ko ek saat bayan karne k liye akhbarat mein article likhna ya program munaqqid karna shuru kardain.

6. Yaad rahay yeh Yemeni parcham wohi parcham hai jisko riwayaat mein sab se aala aur arfah parcham ka naam diya gaya aur uski wajah unki poori duniya se takar lena hai.

Kash hum bhi unkay sath sath is tehreek ka hissa ban saken, chahay zabaan se, chahay qalam se, chahay jis mumkin tareeqy se.

Umeed hai is baat ko aam karne mein hum sab apni mukammal koshish karaingay or Kashmir k mislay ko bhi zada se zada highlight karain ye soch kar naa beth jayen k dusray to kar rahay hain hum rehne detay hain yaad rakhain aap apne amal k jawab’day hain. Is leye khamosh naa rahain kosheh kartay rahain, INSHAHALLAH kamyaabi sirf-o-sirf Musalmanon ke he hogi.

Tuesday, 20 August 2019

FAUJ PER BHAROSA KARAIN

Kya humey pata hai k aaj agar hamari fouj aur ISI Pakistan k difaa se peechay hat jaye ya Pakistani fouj aur awam ki aapas mein jung ho jaye to hamara kya banay ga.

Ayen Jaiza Letay Hain:

Sab se pehlay yaad rakhye k hamara haal Shaam, Iraq aur Yemen ki terhan ho ga. Hm par chemical aur biological hatyaar istemaal kiye jayen gy. Hamary bachay bhi sarkon par lawarison ke terha roo rahay hongay aur hm ko America, England, Russia, aur Israel mil kar marain gy aur sab se bhayanak halaat is waqt hogi jab India k log hamhare biwi bachon ko Burma k Musalmanon ke terha katen gy.

Duniya ka koi bhi mulk humey ya hamhare biwi bachon ko panah naahi day ga aur koi hukoomat ya UNO hamhare haqooq k liye khara naahi ho ga uski jeeti jaagti misaal aap k samnay hai k kon sa mulk ya kon sa insani haqooq ka idaara ya UNO Palestine ya Shaam k Musalmanon k liye baat kar raha hai aur humey duniya mein kahin par bhi panah naahi miley gi Burma walon ko to phir bhi Bangladesh ne panah day di, lekin hm na India na Iran na Afghanistan na China kahen par bhi naahi ja satke, kyun k hamari tadad he itne zada hai koi mulk itna bojh bardash nhe karsakta.


Yeh mukhtasir si halaat kashi mein ne ki hai k agar hm aaj apne jali or jhooty hukmaran ya bairooni propaganda ka hissa ban kar apni afwaj-e-Pakistan ya Adliya ya Agencies se ghaddari karte hain to uski saza hamhare bachon ko yateem aur be yaar-o-madad gaar ban kar aur humahari biwion aur behnoon ko bewa aur kafiroon ki mehfiloon ki ronaqe ban kar miley gi. Ise liye Pakistan ke afwaj aur uski Agencies jaisi bhi hain hamhare haq mein hain aaj jo hmm chain ki neend raat ko sotay hain to uski wajah afwaj-e-Pakistan hain aaj agar hmm par koi kafir hamla karne se pehlay sochta he to uski wajah Pakistan ki Agencies hain, werna mein ne aur aap ne to koi aisa kaam naahi kya jiski wajah se hamhare mulk k dushman hmm se khaufzadah hoon lekin aaj ALLAH ne hmm ko moqa diya hai hmm mein se har koi Pakistani fouji aur ISI ka fard banay aur Pakistan aur afwaj-e-Pakistan aur ISI k khilaaf aur har woh tabqa chahy wo siyasat ke shakal me ho ya mazhab ya liberal ki shakal mein ho ya hukmaran ki shakal mein jo koi bhi hamhare mulk ko tornay ki koshish karay hmm usko toar kar rakh den gy.

Apne ird gird k mahol ko dekhain jo aalam Shiah Suni, Brelvi Diobandi ki baat karay woh Pakistan ko tornay ki koshish kar raha he. Jo Pakistan aur afwaj-e-Pakistan ya Agencies ko bura bhala kahe woh Pakistan ko tornay ki koshish kar raha hai. Jo apni tanzeem ya apne ilaqay ya apni nasal k haqooq ki baat karay woh Pakistan ko tornay ki saazish kar raha hai aur un tamam jamaaton k khilaaf uth kharay hon aur aisay anasir ko munh tour jawab den.

Mein ne aapko is pegham se aagah kar diya he ab aap apna farz ada karen aur is pegham ko agay phelayen.

Pakistan ne aapko aik shanakht di, rishta diye maal-o-doulat se nawaza, izzat di, maa baap behan bhai sab kuch diya, aaj waqt hai sochnay ka k hm ne is mulk ko kya diya?