Sunday, 29 September 2019

BHAROSA YA DHOKA

Aurat yehi chahti hai k us ka shohar us per bharosa kary per kia wo khud bharosa karti hai? Shohar agar kesi ko dekh bhi le ya kesi ke tareef kardy to aurat ander he ander shak me mubtala hojati hai, jis ka izhaar mukhtalif soorton may wo apni narazgi se karti hai or shohar ko is ka andaza bhi nhe hota. Lakin dusri taraf agar dekha jaye to aaj kal TV dramon me yehi sikhaya jaaraha hai k mard apni aurat per har haal me bharosa kary chahy wo kuch bhi kary kesi se bhi mily bas mard apni soch ko apni aurat k leye musbat (positive) karly.

Aakhir kyun aik mard aesaa kary? Aakhir mard ko he kyun apni soch badalne ke nasiyat ke jaati hai, mard he ke fitrat per hamla kar k usay kaha jaata hai k wo apni soch ko musbat kary. Zarurat is baat ki hai kay aurat apni harkaton ko theek karay.

Ye baat achi terha aurat ko samajh lena chahye kay mard kabhi bhi apni fitrat ko nhe badal sakta, aur agar fitrat badal jaaye to wo naa'mard ban jaata hai, jo aurat kay kesi kaam ka nhe rehta, phir hakeem kay tajurbay bhi kaam nhe aatay.

Apnay shohar ki izaat ki hifaazat karain aur us per bharosa karain tabhi wo aap ki izaat ki hifaazat karay ga aur aap per bharosa karay ga.

Saturday, 28 September 2019

GUNAHON KA DOUR

Is dour me har shaks majboori ka rona roota hua nazar aata hai aur us ke wajah se gunahon me dooba hua hai, koi haram zariye se apnay ghar ka kharcha pura krta hai, koi jhoot bol kar apna maal bechta hai, aurat apnay jism ke numaish kar k isay nay dour ke zarurat aur taqaza qarar deti hai.

Bacha joon joon bara hota jaata hai usay sirf duniyavi zaruraton ke aehmiyat ka aehsaas dilaya jaata hai, usay ye sikhaya jaata hai k agar paisa nhe to kuch bhi nhe, tawakkal-il-lallah ka to koi tasawwor he nhe yehi wajah hai k bacha jb bara hota hai aur usay rizq kamanay ka koi jaiz zariya nhe milta to wo najaaiz zariya istemaal karna shuru kardeta hai aur usay apni zarurat aur sahi samajhnay lagta hai.

Aaj kal ke maayen bhi apnay bachon ko tawakkal-il-lallah sikhanay kay bajaye duniyavi taleem aur paisa kamanay per zour deti hain, bachay ko ye sikhaya jaata hai k agar taleem hasil nhe karogy to nokari nhe milay ge aur agar nokari nhe mili to ghar kesay chalao gy rizq kesay hasil karo gy. Jabkay rizq denay wali zaat to ALLAH ke hai phir bhi bachay per keya jaanay wala ye zulm aur brain washing darasal usay galat raastay per le aati hai aur wo us galat raastay ko apnay liye jaiz samajhnay lagta hai chahay qatil (killer) he kyun na ban'naa paray.


Incomplete...

Friday, 27 September 2019

ABHI BACHI HAI

Bachi bachi keh keh kar k abhi bachi hai samajh jaye ge, abhi choti hai rok tok naa karo. Jb aap ke beti kesi aur ke bachi ban jaati hai tb jaa k aap ko hosh aata hai k ab wo bari hochuki hai, tb aap ke terbiyat karnay aur usay samjhanay ka koi faida nhe hota.

Apnay bachon ke terbiyat un k bachpan se shuru keya karain khas tor per larkiyon ke, kyun k unhone he is quam ke nasal ko aagay brhana hai aur agay bacho ke terbiyat bhi maa ban kar karni hai.

Afsos is bat ka hai k aaj k maa baap apni betiyon ke terbiyat per tawajjat deny kay bajaye un ko mobile pakra kar social media sites per account bana kar de detay hain, jis ke wajah se duniya bhar me mojood shaitani tanzeem'on ke rasai aap k bachon tk hojaati hai wo unhain bekha kar un ke mind creation kar k unhain gumrah kartay rehtay hain natijaa ye nikalta hai k jb aap k bachay baray hotay hain to wo aap ko jahil aur kesi puranay khayalaat ke pairvi kartnay wala samajhtay hain.

Apnay bachon ke terbiyat per khas tawajja den, is ke importance ka is baat se andaza lagaya jaa sakta hai k Islam ne aurat per koi zimadari nhe lagai naa Deen ke tabligh na Jehaad naa rizq kamaana naa ghar k kaam kaaj ke zimadari, ye sari zimadari mard per laga di hai kay wo unhain pura karay, aurat per sirf aulaad ke terbiyat ke zimadari lagai hai us me bhi mard ko shamil keya hai magar alag se aurat ko muntakhib keya k bachay apni maa se zada qareeb hotay hain, aur maa har waqt apnay bachon per tawajja rakhay ge.

Aaj kal kay jahilaana dour me mukhtalif advertisment aur dramon filmon k zariye se aurat ko ghar se nikanay ka dars diya jaata rehta hai, is ke aik wajah ye bhi hai k shaitan aap k bachon per aasani se rasai hasil kar k unhain behkana chahta hai. Jitni achi terbiyat maa karsakti hai wo koi nhe karsakta, dusron k bachon ko parhanay aur un per apna waqt barbad karnay se bethar hai apnay bachon per tawajja den aur unhain aik acha insaan banayen han agar majboori ho to wo aik alag baat hai magar yahan har aurat shokiya phirti hai us ke ghar se bahir phirnay ke khowaish km honay ka naam he nhe lati, pehlay parhai ka bahana phir nokari ka bahana.

Aakhir me meri tamam maa baap se guzarish hai agar aap mustaqbil me aik acha maushara apnay bachon ko dena chahtay hain to ye mat sochain k khali aap ke kosheh se kia hoga, aap kosheh karain aur apnay bachon ke achi terbiyat karain, agar acha maushara naa bhi mila tb bhi umeed to hogi kay acha maushara bananay walay log mojood hain jo aap kay apnay bachay hongay.

Apnay bachon kay liye waqt nikalain is se pehlay k wo aap ko ghar se nikalain.

Thursday, 26 September 2019

ADVERTISMENT KA FITNAA

Dour-e-hazir me jis terha advertisment ko brain washing ka zariya banaya jaaraha hai wo kesi se dhaka chupa nhe, naach gana ho yaa aurton ko fashion aur nagi duniya ke taraf lana ho ya carrier k naam per un me is soch ko ubharna ho k nikah se zada carrier zaruri hai aur wo mard k bagair sb kuch karsakti hain unhain mard ke zarurat nhe, unhain aagay barhna chahye, kuch karna chahye.

Barhana jism ke numaish karna to koi burai he nhe samjha jaata jo waqt se pehlay he km umar larkon ko ye sochnay per majboor kardeti hai k aakhir wo itne kasheh kyun mehsoos kartay hain aur mazeed jism dekhnay ke khowaish un k dil me paida hoti hai. Achanak se aajanay walay ye behooda qism k faishon zada nangay advertise is quam ke maaon ko nazar kyun nhe aatay, apnay baiton ka mustaqbil barbad karrahi hain chand fazool dramon ke khatir, phir kehti hain k baita parhai me dilchspi nhe laita. Baita kahan se parhai me dilchspi le ga us ke dilchspi to aap ne kahen aur laga di. Larkiyan parhai may aagay nikal jaati hain aur aap ka baita larkiyon k chakar me he reh jaata hai phir nokari bhi larkiyon ko he milti hai. Is ka sab se bara nuqsaan ye hota hai k aap ka baita berozgaar phirta hai ya km tankhowa per kahen kaam karta hai jis ke waja se kesi ke beiti rishtay k intezaar me bethi rehti hai ya nokari kar k apna ghar chala rahi hoti hai.


Dusri jaanib adm tawazun ka jo mi'yaar qaim keya jaraha hai k aurton se taqat k kaam karwatay huay dekhatay hain aur mardon se ghar k kaam, ajeeb jahaalat hai jo paida ke jaarahi hai in fazool qism ke advertisment k zariye se, is ko business ke zuban me mis management ya management ka fault kehtay hain k jis ke jitni taqat aur salahiyat ho us se utna kaam lenay k bajaye us se zada kaam lia jaaye aur jo zada taqatwar ho us se km kaam liya jaaye. Aurat ke izat ko zalil kartay hain us se car k tyre saaf karwatay hain gariyon me petrol dalwatay hain us ke izzat ko sarak per laa kar phir isay aurat ke aazadi kehtay hain. Ghar me kahana banana aurat ko qaid karna aur ghulami hai jb kay hotels me waiter k tor per kaam karna in k nazdeek aurat ke aazada hai. Ye sabaq de rahi hain ye advertisment companies. In k nazdeeq ye aazadi hai aurat ke k aurat ghulamon jesay kaam karay aur fakhar mehsoos karay, pagal bana'nay wali ye advertisment companies.


Is jahalina aur pur fitan dour me har koi khudgarz bana phirta hai aur kesi ko kesi ke parwah nhe pata nhe kia teer marna chahti hai ye nojawan nasal aur kis baat k liye ubhara jaaraha hai is advertisment kay zariye se. Ghar se niklo aur jo gee chahy karo, apni marzi k malik bano, gumrah karna shuru kar dia hai kuch logon ne hamari quam k Musalmanon ko

Chand third class qism k log advertisment k zariye se hamari ghar ke aurton ka har waqt brain wash kartay rehtay hain aur unhain is baat ka aeh'saas bhi nhe hota chotay bechon ka dimagh kharab karahay hain. Hamain khud sochna hoga aur in ke jahaalat se apnay bachon ko bachana hoga. Werna wo dour door nhe jab aap kay bachay aap ko old house me sirf is wajah se phenk ayen gy k aap k khas'nay ya bimari ke wajah se un k bachay disturbed hotay hain ya un ko bhi bimari lagnay ka khatra hai.


Zara achi terha sochiye...!

Tuesday, 24 September 2019

QURAN KAY MAANI

QURAN ka lafz Iqra ya Qaraa se nikla hai jiska matlab hai parhna. Iqra ka matlab hai parhna. Lafzi maani kay lehaaz say QURAN ka matlab hai kasrat say parhi jaanay wali kitaab ya bar bar parhi jaanay wali kitaab.

Ye baat ajeeb bhi nhe hai kyun k QURAN duniya me taqribaan har parha likha shaks QURAN parhta hai, jo Musalman hain woh bhi aur jo Islam se nafrat kartay hain wo bhi QURAN ko parhtay hain.

Musalmanon me parhnay walay, yaad karnay walay, tilawat karnay walay, aur ilm sikhnay walay kasraat se parhtay hain.

Kafiron may Islam se nafrat karnay walay, Islam ko badnaam karnay k liye QURAN se mukhtalif aa'yaat ko tor ma'ror kar paish karnay walay, QURAN ke baaton ka galat matlab nikaalnay walay bhi QURAN ko kasraat se parhtay hain.

ESSAI, YAHOODI, HINDU AUR MULHID KE PECHAAN

Social media per degar mazhab se taluq rakhnay walay log mulhid ban kar Musalmanon ko gumrah karnay ke kosheh kar rahay hain in ko jaan'nay ka asaan tariqa ye hai k pehlay to in se pucha jaaye k ye mulhid hain ya in ka taluq kesi aur mazhab se hai, agar ye khud ko phir bhi mulhid kahain to phir aap in se kaho k ye apnay munh se kahen k "essai, yahoodi ya hindu ke aulaad hona meray liye aik gaali hai aur mujhe ye gaali mt do." Phir pata chal jaye ga k in ke asliyat kia hai.

Ye jo dawa kartay hain k Islam k mutaliq sb kuch jaantay hain, inhone he Islam ko sahi terha se parha hai baqi kesi ne parhnay ke zehmat nhe ke sb suni sunai baaton per Emaan laaye hain. In se pucho k Islam me Maa Baap k huqooq, parosiyon k huqooq, rishtadaaron k huqooq, gareebon k huqooq, silah rehmi, k baray me aap kia jaantay hain. Lag pata chal jaaye ga in ke knowledge ka, aik chota sa jumla bol kar apni jaan chhura lengay k ye sb dusri kitaabon se chori kia hua hai Islam ka apna nhe hai. Is say pata chalta hai in ke jahaalat ka level.


continue.....

Monday, 23 September 2019

SOOST AUR KAAHIL LOG

Dour-e-Hazi ke ijadaat ne inssan ko jitna soost bana dia hai ise terha dimagh aur dimagi salaahiyaton ko bhi kamzoor kar dia hai, yehi wajah hai k aaj k insaan ke aqual per pathar parh gaye hain, taleemi maidaan me dekha jaaye to aadhay se zada nalaaiq nikaltay hain, dafter (office) me bhi kaam karnay walay km aur kaam chor aur apna kaam dusron peer daalnay walay zada milengay, ghar k kaam bhi adhooray paray rehtay hain aur khud zehmat bhi nhe kartay k usay khud mukammal karlen, ise terha aksar students taleem hasil karnay k baad apni degree kai kai saalon bad nikalwatay hain, apnay rishtadaaron se milnaa chor dia bas masroofiyat ka bahana banatay rehtay hain haqeeqat me dil nhe chahta ghar se nikalnay ka.

Zindagi k har mamlay me insaan bas asaniyan he asaniyan chahta hai, jo k is duniya me mumkin nhe, is liye bethar hai k insaan is mehnat aur kosheh karay

continue.....

Sunday, 22 September 2019

ILHAAD MAZHAB KA MAQSAD

Dour-e-hazir me logon ko aur khas tor per Musalmanon ko gumrah karnay k liye jo dajjali network is waqt Pakistan may kaam kar raha hai wo kesi se dhaka chupa nhe taqribaan har shaks ka social media aur tv programs k zariye se in se wasta parta hai per andaza nhe hota k ye ilhaad ka dajjali network kis terha kaam kar raha hai aur unhain gumrah kar raha hai, Islam se taaluq rakhnay wali chezon ka mazaq urana maslan Jannat Dozakh, Farishtay wagera hatta k ALLAH ke taraf jhooti baat ko bhi mansoob kardetay hain sirf thori der k shughal (comedy) k liye, is k ilawah mukhtalif firqon k khilaaf likh kar un k darmiyan nafrat phelanay walay post tiyar kartay hain aur chand jasbaati Muslaman andha dhund unhain forward kartay hain aik firqay ka shaks dusray firqay k khilaaf  post share karta hai to dusra shaks kesi teesray firqay k khilaaf, aur ise mawaad ko wo istemaal kar k ger muslims ko Islam qabool karnay se roktay hain aur ise terha Deen se door Musalmanon ko mulhid karnay k liye bhi istemaal kartay hain.


Mulhid Ka Tariqa-e-Wardaat:

In ka sb se pehla tariqa-e-wardaat ye hai k ye Islam k khilaaf likhtay rehtay hain aur Islam ke asal buniyad jo kay gaib per yaqeen hai us per hamlaa kartay hain aur mazaaq uratay hain, us k badlay apnay nazariye ko paish kartay hain k jo zahir hai us per yaqeen karo aur dalaail detay hain.

Ye log apnay aap ko ex-muslim kehtay hain, aur ye kehtay hain k hum bhi aik Musalman gharanay may paida huay aur jb hum ne Islam ko study kiya to us me sirf jhooti aur farzi kahaniyan then (ASTAGHFIRULLAH), wazay rahay k QURAN me maazi k waaqiyaat mojood hain jinhain ye jhooti aur man-gharat kahaniyan kehtay hain. In ke is harkat ka faida in ko ye hai k jo bhi km ilm rakhnay wala Musalman ya yun keh lo aaj ka modern aur azaad khayal Musalman jb in ke is terha ke baat ko sunay ga to wo bhi parhnay ke zehmat nhe karay ga (wesay bhi in k paas Islam ko study karnay ka waqt kahan hota hai) sirf in kay Islam k khilaaf (against) ilzaamat ko sunnay ga or mulhid hojaye ga.

Ye is soch ko Musalmanon me paida karna chahtay hain k Islam k har hukum aur har baat ko hatta k har har lafz ko tanqeed (criticism) ke nigah se dekho, criticism wali soch ko ye mazhab per apply karana chahtay hain, yani asaan alfaaz me kaha jaye to ye Islam se mutaliq har chez har baat ko aik manfi dairay (negative circle) may rakh kar us per sawalaat ke bochaar karana chahtay hain (maslan: hamain kyun paida keya gaya, jannat dozakh, kyun banai, jb koi kaam ALLAH ke marzi se nhe hota to phir insaan ko galtiyon per azaab kyun diya jaye ga, pehlay Nabi aaty thay ab kyun nhe aatay, alag alag asmaani kitabain kyun utaarna paren, aur is k ilawah be-shumaar sawalaat hain jo ye kar kar k Deen se door Musalmanon ko gumrah karna hain).

Science per belief karnay wala ye fitna, har baat me science ko code karta hai, aur sciencei dalaail deta hai taakay Musalman zahir per yaqeen karna shuru kardain, aur gaib per yaqeen khatam hojaye, ab in se ye pucha jaaye k ye science k baap dada kon hain to lag pata jaye ga k wo bhi sb k sb ALLAH ka ya is kainaat me kesi k Khaliq honanay ka inkaar karnay walay hain Stephen Hawking, aur Albert Einstein aur in k jesay aur mulhid scientist in kay aaqa hain. Richard Dawkins ke kitaab (book) The God Delusion in ke mazhabi kitaab hai, Darwin theories khas tor per evolution k hawaly se in k liye kesi Nabi k farman se km nhe hai. Ye in ke har baat ko mantay hain aur andhi taqleed kartay hain. Jb in se pucha jaaye k jin theories ko tm maantay ho kabhi un per research ke hai khud, khud tehkeek ke hai kabhi to zero result samnay aaye gaa sirf ratta lagaya hua hai in theories aur concepts ka in logon ne aur usi k zor per Musalmanon ko Islam se door kartay hain.


Mulhidon Ko Jawab:

In se kaha jaaye k agar tmharay tamam sawalon k jawabat dy deye jayen to kia Islam qabool karlogy, to ye kabhi haan nhe karengy balkay nay nay sawalaat dhund dhund kar lana shuru kardain gy, phir ye hamain kyun zehni ghulami ka tana dety hain ye khud bhi to apnay baapon ke theories k zehni ghulam banay huay hain jo k aye din fail bhi hoti rehti hain.

Ye kehtay hain k hm Musalman mazhab ke farzi kahaniyon per yaqeen rakhtay hain aur koi research work nhe kartay, in se pucha jaaye k tm kon saa zahir per yaqeen rakhtay ho, tm bhi to big bang jesi farzi kahani per yaqeen rakhtay ho, to phir tm me aur hm me kia farq hai tmhara kia research work hai, tmne kon saa big bang hotay dekha hai jo QURAN ke ayat ka inkaar kartay ho k hm ne to kainaat ko bantay huay nhe dekha. Baat to same he hai per andhon ko nazar nhe aata.

Science bhi yehi kehti hai k har jandaar pani se bana hai aur QURAN ne bhi yehi kaha hai to tmhain ye similarities nazar nhe aaten kia. Kesay pata QURAN ko ye batain, ye batain ya to kia research kar k maloom kar sakta hai ya phir bananay walay ko pata hoti hain. Ye baat to confirm hai k science ne ye chezen nhe banayen sirf research kar k discover keya hai, to phir wo kon hai jis ne QURAN me in baaton ka zikar keya hai.

Kehtay hain k Islam talwaar k zor per phela, agar Islam talwaar k zor per phela hai to phir aaj Europe aur America may Musalman kon se talwaar chala rahay hain jo Islam wahan tezi se phel raha hai church ke jagah Masjidain le rahi hain, itne mukhalifat k bawajood log tezi se Islam qabool kar rahay hain agar ye mukhalifat na hoti to yaqeenan puri duniya may sirf Islam he hota, Islam wesay he phela jesay aaj phel raha hai. Aur agar Islam talwaar k zor per he phel hai to phir aaj Kashmir aur Palestine me jahoodi aur hindu apna mazhaab pehlaanay me kyun nakaam hain, aaj to bomb barood goliyan sb mojood hain phir abhi tk Musalmanon ke aksariyat kyun. kia sirf Islam he me itni taqat hai k wo talwaar k zor per phel sakta hai baqi mazhab me itni taqat nhe k wo apnay bomb barood se Musalmanon ko Deen-e-Islam se pher sakain.

Naa to talwaar Musalmanon ke ijaad hai naa goli na barood, na bomb, aur naa he Musalman wo pehla garoh (group) hai jis ne in chezon ko istemal keya ho. Ye chezen pehlay Musalmanon per istemal hui hain phir Musalmanon ne apnay difa me Jehaad keya hai aur maal-e-ganimat k tor per ye ijadaat (inventions) Musalmanon k haat aai hain.Fasadi aur insaniyat k dushman un logon ko kaho jin logon ne ye chezen ijaad ki hain. Wo sb k sb tmhary he baap dada hain naa k Musalman.


Mulhidon Se Sawalaat:

Insaaniyat ka dars denay wala zara ye bataye k qatal kon karay ga? Wo kay jis ko jawab dahi ka ahesaas hoga ya wo jis ko kesi ko jawab'day nhe?

Science ke theories to aye din fail hoti rehti hain to phir mai kyun science per Emaan laun?Kia garantee hai k science ke ye theories ke ainda 10 15 saalon me fail hojayen to phir may kahan khara hunga, mera to koi research work nhe?

Mazhab to aaj tk apni kesi aik baat se bhi nhe phira, aur science aye din fail hoti rehti hai, apnay concepts se phirti rehti hai, to phir dono may se mazboot kon hua?

In se pucha jaaye k agar in k tamam sawalon k jawab inhain de deye jayen to kia Islam qabool karlengay?

Agar Islam sacha mazhab nhe to phir established science kesay Islam ko prove karti hai? Kia ye daleel kafi nhe kay koi hai banany wala jis ke baat QURAN se sabit horahi hai?

Kia is science per belief keya jaa sakta hai jo is kainaat ko banany walay ko dhund'nay k bajaye alien ko dhund'nay may lagi hui hai?

Science khud kehti hai k koi chez kesi k banaye bagair nhe banti to phir ye kainaat kesay ban gai aur kahan se aagai?

Un k khilaaf kyun nhe boltay jin k pas Musalmanon ko qatal karnay ka killing licence mojood hai. Musalman apnay difa me jehaad karay aur QURAN k hukum per amal karay to wo insaniyat ka dushman aur jo musalmanon k gharo me ghus kar bethay huay hain un ke aurton aur bachon per zulm kartay hain wo insaaniyat k thekay daar?


INSHAHALLAH zindagi rahi to mazeed sawalaat in k samnay le kar aunga aur in k sawalaat k jawabaat bhi dunga.

Saturday, 21 September 2019

FRIDGE AUR DEEP FREEZER KA NUQSAAN

Fridge aur deep freezer ke ijaad (invention) ne hamari Muslim quam ko tabah kar dia hai. Zakhira andoozi hamary ander bhar chuki hai, pehlay ka Musalman jo khana bach jaata tha wo gharibon me baant deta tha, is ka sb se bara faida ye hota tha k koi bhooka nhe soota tha aur dusra ye k aglay din jb log khanay peenay ke chezon ke kharidari kartay aur dukan daaron ka bhi karobar acha chalta.

Ab log khana zaya bhi kartay hain aur phenk bhi detay hain. Hamari is harkat ke waja se ALLAH bhi naraz hota hai aur rizq me bhi be-barkati aati hai, phir hum sochtay hain k maal me barkat kyun nhe hai, haqeeqat to ye hai k aap ko qadar he nhe hai. Apni aa'na ka ghala ghont kar zara apni asal zarurat ke taraf ayen aur phir apni aiyashiyan dekhain, pata chal jaye ga.

Hamain fridge aur deep freezer jesi nahoosat se bachnay ke zarurat hai, km se km itna to karain k jo khana bach jaye usay gareebon me bant dain, thori zehmat karain ghar se nikalnay ke, aglay din k liye jama na karain, aglay din wesy he aap ne dusri dish banani hoti hai, ghar k tamaam afraad usi per itefaq karain. Shukariya

Thursday, 19 September 2019

ILHAAD KA FITNA

Ilhaad kay fitnay ko phelaanay kay liye social media kay zariye se har shaks tak rasaai hasil ke jaarahi hai, jo log is qism kay mawaad ko dekh chukay hain ya aesy pages ka visit kar chukay hain unhone aik baat to lazmi note ke hogi kay in ka har post har mawaad Islam kay he khilaaf hota hai. Islam kay ahkaamat ko tor maroor kar bayan kartay hain ya baat kuch hoti hai QURAN ya HADEES se apnay matlab ko nikalnay k leye usay apnay andaaz se bayan kartay hain aur asal baat ko chupaatay hain. Maslan koi bhi QURAN ke Ayat ko adhi bayan kar kay us k khilaaf likhna shuru kardengay. Ye Islam ke har baat ka bas manfi (negative) matlab he nikalengay.

Ye log NGOs kay tukron per paltay hain is liye har waqt social media per nazar ayengy, kyun k in ko aur koi kaam nhe, ye in ka task hai, in k ghar ka kharcha pani ise se chalta hai magar jb in se pucho gy to kahengy k hum ye kaam logon ke aankhain kholnay k liye kar rahay hain, inn se zara ye to pucho kay aankhain kholnay k liye Islam aur Musalman he reh gaye hain kia? diger mazahib ke kitaab me kuch nhe milta inhain, halankay khud he boltay hain k hum logon ko mazhab se aazaad karana chahtay hain. Magar haqeeqat ye hai k in ka kaam Musalmanon ko Islam se door karna aur deegar mazahib k logon ko Islam ke taraf aanay se rokna hai, kyun kay Islam duniya ka wahid mazhab hai jo is waqt tezi se phel raha hai, is k jawab me koi chara nhe k ye logon ko mazhab se he door kardain, is kaam me aap ko hindu aur essai paish paish nazar ayengy per wo apnay aap ko ilhaadi kahengay kesi mazhab se nhe jorengay werna Musalman samajh jayengay k ye in ke chaal hai.

Dusry baat jo aap ne note ke hogi kay ye groups ke soorat me hotay hain aur apni baat me wazan paida karnay k liye aik dusray k post per comments kartay hain taakay baat ko aur bhi mazboot banaya jaa sakay. Ye science ko mannay waly har baat me science ko le aaty hain, physical phonomenon of nature per yaqeen kartay hain (yani ye kainaat khud ba khud chal rahi hai or khud ba khud bani hai) in se pucho k aik pen ya pencil to khud ba khud nhe ban sakti ye kainaat kesay ban gai?. Aksar is baat ka jawab is terha detay hain k "han hum mantay hain k is kainaat ko bananay wala koi hai per us ka taluq kesi mazhab se nhe hai". Darasal ye log new world order k peer-o-kaar hain in ka maqsad logon ko nay khuda ke taraf ragib karna hai. Jab dajjal aye ga to wo khudai ka dawa karay ga aur apni taqat ka muzahira karay ga aur mukhtalif shobday dekhaye ga jis se mutasir ho kar log us per emaan le ayengy us ka dawa yehi hoga k agar us k ilawah koi aur Khuda hai to wo kahan hai us k muqablay per kyun nhe aata, aesi batain kar k he wo logon ko gumrah karay ga. Aik baat yaad rakhiye ga k Musalmanon k Emaan ke buniyad gaib per hai aur in ka sara focus zahiri asbaab per hai k jo nazar aata hai wohi haqeeqat hai, aur jo nazar nhe aata wo sb jhoot hai.

Liberalism ko agar dajjal ka mazhab kaha jaye to ye bhi galat naa hoga, lakin abhi in ke kosheh sirf itni hai k logon k zehnon se un k mazhab ka tasawour nikala jaye aur mazhab se mutaliq sawalaat kharay keye jayen taakay Emaan kamzoor tareen darjay per chala jaye aur aasani se kesi aur baat ko qabool karlay, is k baad ye agla marhala hoga k logon ko kesi nay khuda ke taraf ragib keya jaye ga aur science bhi is k sat parallel chal rahi hai. Aik nuqtay se shuruwat tk to pohunch gai hai science, dajjal k aanay se pehlay he ye dawa karday ge k is kainaat ko bananay wala koi hai, phir wo log jo mazhab se to pehlay he bezaar hogaye hongay aur naumeed hongay k un ke duayen qabool nhe hoten dajjal k fitnay se mutasir hongay, dajjal aakar un ke muradain is shart per puri karay ga k wo us per emaan le ayengy.

Aakhir me Parhnay walon se sirf itne guzarish hai k in baton ko agay musalmanon tak ponchayen, ye fitna hamari universities tk to tha per ab school aur colleges tk pohunch gaya hai, apnay bachon k Deen Emaan ke khud hifazat karain wo aap ko kuch nhe batayengy k un ke dosti kin logon se ho gai hai aur social media per wo kis qism ka mawaad dekhtay hain. Agar aap ne apnay bachon ke islah naa ke to qayamat walay din apnay bachon ke gumrahi k sabab aap bhi un k sat jahannum me jayengy.

Mazeed maloomat kay liye hamara topic ILHAAD MAZHAB KA MAQSAAD zarur parhain https://www.rurdu.com/2019/09/ilhaad-mazhab-ka-maqsad.html

Zindagi rahi to mazeed is hawalay se QURAN aur HADEES ke roshni me is fitnay ko step by step benaqaab karunga. INSHAHALLAH

Tuesday, 17 September 2019

GUSTAKHANA KHAKAY PHELANAY WALAY ZARA SOCHIYE

Afsos kay saat kehna par raha hai k gustakhana khakay duniya mein kafir se ziyada Musalman phela rahay hain, gustakhana khakay bananay walay aik khakay k oopar likh detay hain k banany waly ko laanat bhaij kar agay share karen aur jazbati Musalman aao dekha nah tao shuru ho jatay hain share karna. Ab kufar ka kaam khatam aur Musalman laanat bhejnay k chakkar mein aisay shuru hongay k poori duniya taq yeh gustakhana mawaad pohunch jaye ga.

Jis ne nahi bhi dekha hoga woh bhi dekh le ga aur la ilmi mein Musalman bhi gustaakhi k murtakib ho jaien gy.

Un kafiron ko laanat bhejnay se to koi farq nahi parray ga, magar Musalman is pay ehtajaji hangamay karen gy. Muslim mumalik mein inteshaar aur fasadaat phelay ga aur phir kaha jaye ga k Musalman terorriest hain aur haqiqat main yahi wo laanti log bhi chahtay hain, yun inka agenda poora hoga .

Aisay mawaad ko hide karen, report karen aur delete karen. Yeh maamla josh ki bajaye hosh se hal karnay ka hai.

Monday, 16 September 2019

TARAKKI OR ZUBAN

Duniya ki paanch hazaar sala tareekh mein aik bhi qoum aisi nahi jis naay kisi doosri zabaan mein taraqqi ki ho.

Duniya ka jadeed tareen mulk Israel. Israel mein bohat kam English bolnay waly hain.

Km muddat mein intehaai taraqqi karnay wala mulk Germany. Germany mein log English se nafrat kartay hain.

Dunya-e-Islam ka taraqqi yaafta mulk Turkey. Turkey mein ustaad se le kar army cheif, aur science daan se le kar cheif justice taq sara nizaam turk zubaan mein hai.

China mein aap ko koi sarkari ya niji ohday daar English zubaan boltaa nazar nahi aye ga.

India jaissa qadamat pasand mulk aqwam-e-mutahidda (United Nations) mein bhi aap ko hindi boltaa nazar aye ga.

Iran ka tamam sarkari nizaam farsi mein tarteeb diya gaya hai, aur Iran se har saal noble inaam kay liye koi na koi naamzad hota hai.

Pata nahi kis naay hamaray dimagh mein ghusa dia kay hum English kay baghair taraqqi nahi kar saktay?

Ajeeb hai kay Urdu adab ki tareekh hazaar (1000) sala purani hai aur Angrazi adab aap ko teen(3) soo(100) saal se pehlay nazar nahi aata.

Hamein apni zabaan ko ahmiyat dainee hogi agar duniya mein naam banana hai to saari duniya taraqqi kar gayi apni zabaan ki badolat aur hum nay aadhi umar guzar de angrezi sikhtay sikhtay.

Sunday, 15 September 2019

ZARURAT AUR LALACH


Aik badshah ney kisi shehri ki baat par khush ho kar usay yeh ikhtiyar diya kay woh Sooraj ghuroob hone taq jitni zameen ka daira mukammal kar le ga, woh zameen is ko day di jaye gi, aur agar woh daira mukammal nah kar saka aur Sooraj ghuroob ho gaya to usay kuch nahi miley ga.

Yeh sun kar woh shakhs chal para. Chaltay chaltay Zuhar ho gayi to usay khayaal aaya kay ab wapsi ka chakkar shuru kar dena chahiye, magar phir lalach ney ghalba pa liya aur socha kay thora sa aur agay se chakkar kaat lon, phir wapsi ka khayaal aaya to samnay kay khobsorat pahar ko dekh kar is ney socha is ko bhi apni jageer mein shaamil kar lena chahiye.

Algaraz wapsi ka safar kaafi der se shuru keya. Ab wapsi mein yun lagta tha jaisay Sooraj ney is kay sath musabiqat shuru kar di he. Woh jitna taiz chalta pata chalta Sooraj bhi utna jaldi dhal raha he. Asar kay baad to Sooraj dhalnay ki bajaye lagta tha pigalna shuru ho gaya he.

Woh shakhs dorna shuru ho gaya kyunkay usay sab kuch haath se jata nazar aa raha tha. Ab woh apni lalach ko koss raha tha, magar bohat der ho chuki thi. Dor’tay dor’tay is ka seenah dard se phataa ja raha tha, magar woh tha kay bas doray ja raha tha.

Aakhir Sooraj ghuroob hua to woh shakhs is terhan gira kay is ka sir us jagah ko choo raha tha jahan se usne apna safar shuru keya tha aur paon wapsi kay dairay ko mukammal kar rahay they, yun is ki laash ney daira mukammal kar dya.

Jis jagah woh gira tha isi jagah is ki qabar banai gayi aur qabar par kutba lagaya gaya, jis par likha tha:

"Is shakhs ki zaroorat bas itni saari jagah thi jitni jagah may is ki qabar hai"

Saturday, 14 September 2019

ISRAELI TEHREEK NAMANZOOR


Jis terha se is mulk me khamoosh tehreek chalayi jaarahi hai k Israel ko tasleem karlia jaaye aur ab haal ye hai kay kuch km aqual aur jahil Pakistan may Israel ko tasleem karne ki baat kar rahay hain. Aik bavali aunty nikal kay yahudion kay fazail Quran se saabit kar rahi hain. Baar baar Israel ka naam le kar awam ka rad-e-amal jancha ja raha hai. Ye shar phelany wali aurtain sirf wo baat karti nazar aati hain jis se hamray nazariyaat ko thais ponchay.

Yahudion k mutaliq saaf saaf Quran me likha hai k wo hamary saat kabhi bhi mukhlis nhe ho saktay is kay ilawah bhi latadaad misaalain mojood hain k kis terha Israel ne Arab mumalik ko apnay lapatay me le rakha hai aur unhain tabah karnay ka mansooba bana raha hai. Palestine me jo hamari maa behnon kay saat salooq horaha hai kia wo nazar andaz keya jaasakta hai, in jahilon ko ye nazar nhe aata.

Apni hifazaat kay liye America ko Afghanistan me bitha rakha hai jo wahan shaitan kay seengh (horn) ka kaam sar’anjaam de raha hai.

Guzishtaa kai saalon se hamary jahil molviyon ka aik toula apnay he Musalman Afghan bhaiyon ko shaitan ka seengh qarar de raha tha aur un kay khilaaf fatway de raha tha, Musalmanon kay dil me un kay liye nafrat paida kar raha tha, lakin sb kuch ab zaya hone wala hai, aur sirf ALLAH ka qanoon baqi rahy ga.

Shaitan ka yehi seengh Imaam Mehdi kaya any ka sun kar un per hamlaa karnay kay liye niklay ga aur ALLAH usay rastay me he zameen me dhansaa de ga.

Sb jaantay hain kay Saudi Arab kay naam nehaad badshah America kay isharoon per chalty hain, lakin wo waqt bi door nhe jab aik badshah ke mout k bad America ke is marzi ka darwaza hamesha hamesha k liye band hojaye ga.

Us kay baad dajal ne bhi aana hai aur wo sirf yahoodiyon ke madad karnay k leye aye ga to phir kesy mumkin hai kay yahoodiyon kay saat dosti wala mamla keya jaye aur unhain tasleem keya jaye.

Mukhtasir ye kay aaj kay dour me tezi se uthnay walay fitnon se bachnay ka aik he aasan tariqa hai kay khud bhi Quran samajh kar parhen aur jhootay logon ke baton me aanay kay bajaye khud tahkeek karain kay kia sahi hai aur kia galat.

RANKING KA JHOOTA DOUR

Kaha jaata hai k fahash mawaad search karnay me hamara mulk (Pakistan) pehlay ya dusray number per aata hai, is baat ke kia haqeeqat hai?

Quam k nojawaanon ko gumrah karnay aur un ke brain washing karnay kay liye ye acha harba nikaala hai k jaali ranking kardi jaati hai. Saari duniya me to jesy paak saaf log bastay hain, aik hum he buray aur be-haya hain.

Zadatar jahil youtubers andha dhund videos banana shuru kardetay hain k mai pehlay banaun mai pehlay bana kar video upload kardun, ye bhi nhe sochtay k aap ke ghatiya harkat se quam k nojawanon k zehnon per kitna bura asar pary ga, quam ke betiyon ko badnaam keya jaata hai.

Mai manta hun k buray log hain burai hai hum may, magar itne zaada nhe jitni ye youtubers aur jahil log apni ranking kay chakar me batana shuru kardetay hain, ye bhi nhe sochtay k quam k nojawan betay betiyon per thomat laga rahy hain.

Aesay jahilon ke baaton per kaan na dharen aur un ke baaton ko nazar andaz kardenay me he hamari bhalai hai.

Friday, 13 September 2019

ISLAMI MASHRA AUR HAMARI HAQEEQAT

Hum jis mashray se taluq rakhty hain us ka taluq hindustan se hai naa kay Islam se. Yehi waja hai k hamary han wohi kharafaat mojood hain jo hindustan se ai hain. Yahan basnay walay zadater log Islam se door nazar aatay hain aur apni apna'ai hui kharafaat ko Islam k saat joortay nazar aatay hain. 

Yahan k mashray ko aur hindustan kay mashray ko agar dekha jaye to aap ko aik jessa nazar aaye ga isse liye yahan kay zadatar log aap ko indian bollywood ke filmon aur dramon se mutasir nazar ayen gy, aur unhain apnanay me bhi dilchspi lengy.

Hamary Molvi hazraat haqooq-ul-ALLAH aur haqooq-ul-ibaad ka daras cheekh cheekh kar detay hain per kaanon per juon tak nhe rengti, kuch dinon bad bhool jaatay hain kay Imaam sahab ne Jummay k khitaab may koi nasiyat ke the, aur dusri taraf india se koi naya fashion koi naya hair style aajaye to foran se pehle usay apnatay hain aur fakhar mehsoos karty hain (jahil kahen kay).

Mujhe to ye masla naslon ka ya khoon ka lagta hai aap ke kia raye hai hamain zarur aagah karain.

Thursday, 12 September 2019

NOKARI ME BARABRI YA AURAT KE BARBADI

Aurat ke aazadi k nam per aur mard se baraberi k nam per jo salook keya jaraha hai us se sirf aurat he ki zindagi tabah horahi. Magar is bad'aqual mashray k logon ko ye baat aakhir kon samjhaye.

Har maa chahti hai k us ke beti kesi achay ghar me jaye, us ka shohar us dour k hisab se itna kamata ho k wo aasani se zindagi guzar sakay, lakin masla ye hai k aesy rishtay he nhe milty, aakhir kyun?

Is ke waja aik to nokariyon ka naa hona aur uper se nokariyon ka jo ratio hai us me bhi khawateen kay mazeed izafay ke baat ke jaati hai. Ab mujhe zara apni aqual se batayen k aik taraf to nokariyan he limited hain aur dusri taraf ye khawateen k haqooq ke baat karny waly 50% tk aurton ke nokariyon me izafay ke baat karty hain. Jab ye izafaa hoga to khud ba khud mazeed mard be-rozgaar hongy aur ho bhi rahy hain. Beti apni taleem mukammal karti hai to usay nokari per laga deya jaata hai k jb tk us ke shadi nhe hoti wo apny leye kuch kama kar jama karly taa'kay us ke shaadi k waqt wo paisay us k kaam aasaken.

Hamaray mashray me aurat aur mard ka ratio taqriban baraber hai, is hisaab se dekha jaye to 50% aurton ko rozgaar deny waly 50% larkiyon k rishton me rukawat paida kar rahy hain. Kon se maa apny be-rozgaar baitay ka rishta kesi k ghar le kar jaye gi?

Maa bas yehi rona roti rehti hai k achay rishtay nhe milty, kahan se milengy, is mashray ka haal ye hai k aap k ghar me mojood aap ka baita aur beti ko agar nokari karny ka kaha jaye to aap ke beti ko aap k baitay se pehly nokari mil jaye ge aur wo aap k baitay se zada kama kar dekhaye ge.

Larki agar naa bhi kamaye to kon puchta hai, lakin agar larka naa kamaye to kia koi apni beti ka rishta de ga aesy shaks ko? Kia koi shadi kary ga kese be-rozgaar shaks se apni beti ke, agar baraberi itni he pasand hai to phir apni kamao puteri ke shadi kesi be-rozgaar shaks se karo. Kyun ye braberi nhe kia, jab aik larki ke shadi hosakti hai to phir aik larkay ke kyun nhe?

Aurat k haqooq ke bat karny waly aurat k haqooq ke baat karty hain ya barbadi ke? Ye ham aap per chorty hain.

Wednesday, 11 September 2019

QAYAMAT MAY HISAAB KESY HOGA


Aik shagird naay apne ustaad se poocha: Ustaad jee! Yeh aakhirat mein hisaab kitaab kaisay hoga?

Ustaad naay zara sa tawaquf keya, phir apni jagah se uthay aur saaray shagirdon mein kuch pesey baantey unhon naay pehlay larky ko soo (100) rupay, dosray ko pichatar (75), teesray ko saath (60), chouthay ko pachaas (50), panchway ko pachees (25), chhatay ko das (10), satwen ko paanch (5), aur jis larkay naay sawal poocha tha usay faqat aik rupiya diya.

Larka ustaad ki is harkat par dil giriftaa aur afsurda tha, usay apni tauheen mehsoos ho rahi thi k ustaad naay aakhir usay sab se kamtar aur kam mustahiq kyon-kr jana?

Ustaad naay muskuratay hue sab ko dekhte hue kaha: Sab larkoon ko chhutti, tum sab log ja kar un paison ko poora poora kharch karo, ab hamari mulaqaat haftay walay din bastii k nanbayi ke tanoor par hogi.

Haftay walay din saaray talib-e-ilm nanbayi k tanoor par poanch gaye, jahan ustaad pehlay se hi mojood sab ka intzaar kar raha tha. Sab larkoon k aa jany k baad ustaad naay inhen bataya k tum mein har aik is tanoor par charh kar mujhe apne apne paison ka hisaab dy k usne paison ko kahan kharch keya hai.

Pehlay walay larka, jisay soo (100) rupay miley thay, ko dehktay tanoor ki mundair par charha kar ustaad nay pucha k batao, mere diye hue soo (100) rupay kaisay kharch kiye thay.

Jaltay tanoor se nikaltay shulon ki tapish aur garam mundair ki hiddat se pareshan larka aik pair rakhta aur dosra uthata, kharch kiye hue paison ko yaad karta aur batata k: Paanch (5) ka gur liya tha, das (10) ki chaye, bees (20) k angoor, pachas (50) rupay ki rotiyan aur isi terhan baqi k kharchay. Larky k paon hiddat se jal rahay thay to baqi ka jism tanoor se nikaltay shulon se jhulas raha tha hatta k itni si der mein usay pyaas bhi lag gayi thi aur alfaaz bhi larkhrana shuru hogaye thay. Baa-mushkil hisaab day kar neechay utra.

Is k baad dosra larka, phir teesra aur phir isi terhan baqi larky, hatta k is larky ki baari aan pohanchi jisay aik rupiya mila tha.

Ustaad naay usay bhi kaha k tum bhi tanoor par chharh jao aur apna hisaab do. Larka jaldi se tanoor par charha, baghair kisi tawaquf k bola k mein naay aik rupiya ki ghar k liye dhaniya ki guddi kharidi thi, aur sath hi muskorata hua neechay utar kar ustaad k samnay ja kar khara ho gaya, jabkay baqi kay larkay abhi taq nidhaal baithy apne peeron par pani daal kar thanda kar rahay thay.

Ustaad naay sab larkoon ko mutwajjah kar k is larky ko khaas tor par sunaatay huay kaha: Bachcho! Yeh qayamat walay din k hisaab kitaab ka aik chhota sa manzar nama tha. Har insaan se is ko jis qader ataa keya gaya hai us k barabar hisaab hoga.

Larky naay ustaad ko mohabbat se dekhtay huay kaha k: Aap naay jitna kam mujhe diya, is par mujhe rashk aur aap ki ataa par pyar aa raha hai. Taham ALLAH ki misaal to bohat aala-o-arfah hai.

ALLAH hamein apne hisaab ki shiddat se bachaaye aur hamaray sath maffi aur dar guzar wala maamla farmaiye. Ameeen

Tuesday, 10 September 2019

MODERN TAWAIF

Mazi Ke Aik Jhalak:

Kaha jata hai kay zamana-e-qadeem mein kisi bazari-aurat (randi) ka raqs (mujraa) dekhnay kay liye makhsoos jagah yani kothey ka rukh keya jata tha. To woh randi ahl-e-tamasha ko apni dilkash aadaon aur jism ko barhana haalat mein paish kar kay daad wusool karti thi. Agar is randi yani tawaif se poocha jata kay woh yeh kaam kyun karti hai to soo (100) mein se ninyanvy (99) feesad yeh jawab hota kay majboori hai, mein majboor hon, shoq se nahi karti, wagera wagera. Woh majboori agar maloom karne ki koshish ki jati to har kisi ki aik apni dil soaz kahani hoti, kisi kay sir pay saya na raha to kisi ko shohar ghairat wala na mila to kisi kay sir par maa baab ka saya nah raha, kesi ke koi majboori hoti to kesi ke koi majboori. Yeh saari baten karne ka maqsad yeh kay un twayfon ki majboriyan kisi nah kisi terhan samajh mein aatin theen.

Aaj Ke Tawaif:

Magar aaj ki tawaif ko kya ho gaya hai? Mein baat kar raha hon tik tok, likee, vigo videos wali aurton ke, ye online randi khanaay, jee haan ye online randi khany he hain, bohat saaray logon ko meri baten na'gawaar guzren gi magar woh baten karni bhi zaruri hain. Daikhta hon kay intahai mukhtasir libaas mein malbos yeh Bint-e-Hawa aur naam ki Musalman dosheeza ahl-e-zamana ko apni dilkash aadaon, tight jeans, chusti pajamay pehan kar apny jism ke banawat ke numaish kar k aur oopar agar bas chalay to shirt bhi utaar den. Thumak thumak kar ahl-e-zamana kay samnay khud ko paish karti hai aur daad ki muntazir hoti hai. Kya yeh sab un kothon ki pedawar hain? Kya un kay sir pay bhi kisi ka saya nahi?

Aaj Kay Nadaan Mard:

Samajh me nahi aata k un k bhai, walidain ya un kay shohar ye sb be-gairat hain ya un ko nahi pata Islam kya kehta hai. Jo mard apni aurat ko nhe rookta, usay perwah naa ho k us ke aurat kin germardon se milti hai wo "Dae'yoos" hai, aur ALLAH qayamat k din dae'yoos shaks ko apni Rehmat se mehroon kardy ga.

Khartay KE Baat:

Ye modern or digital tawaif agar tobah bhi karly to kia un videos ko rok paye gee jo usne release kardi hain. Khuda k wastay Deen-e-Islam ko samjho is se pehly k mout aajaye tm ko.

Kafir Aurat Ke Baton Me Naa Ayen:

Aakhir me meri tamam Musalman behnon se guzarish hai k kafir aurat to kafir hai wo to TV dramon filmon me aakar apni aazadi ka izhar kary ge, apni videos banaye ge, apni jahilana aazadi ke batain kary ge. Zamany k samny khud ko nanga karny wali batain kary ge aur aesi baton ko defend bhi kary ge, in k dialogue aur jasbaati taqreeron se aap kyun mutasir horahi hain aap kyun un ke zuban bolna shuru hogai hain, agar aap ko sahi galat bataya jaata hai to wo sahi galat koi apny paas se nhe bata raha hota, agar aap Musalman hain to Islam ke bataon ko samjhen naa k apny fazool jasbaat Islam or Musalmanon ko samjhaane ke kosheh karen.

Munafiq Aurton Se Bachen:

Khas tor per munafiq aurton se bachen jo media per aakar khud ko Musalman kehti hain per zuban un ke kafir hai wo kafir k jumlon se mutasir hain aur kafir ke zuban bolti nazar aati hain. In munafiq aurton ne aik aam Musalman aurat ke zuban ko kafir aurat ke zuban bana dia hai jis ka natija ye nikalta hai k jb wo zuban aurat apny mard k samny kholti hai to yaa to usay talaq hojati hai ya apny shohar ke mohabbat or tawajja se mehroon hojati hai or kahen kahen to mard aurat per haat bhi uthaty hain or maar peet karty huay nazar aaty hain.

Monday, 9 September 2019

GARIBON KE MADAD KARAIN

Aik paanch chay. saal ka masoom sa bacha apni choti behan ko le kar masjid k aik taraf konay mein betha haath utha kar ALLAH se na'jane kya maang raha tha.

Kapray mein mail laga hua tha, is k masoom se gaal aanswoun se bhiig chuke they.

Bohat se log is ki taraf mutawajjah they aur woh bilkul be khabar apne ALLAH se baton mein laga hua tha.

Jaisay hi woh utha aik ajnabi nay barh k is ka nan'na sa haath pakra aur poocha k "kya manga ALLAH se." is nay kaha k "mere papa mar gaye hain un k liye jannat, meri maa roti rehti hai un k liye sabar, meri behan maa se kapray samaan mangti hai is k liye raqam". Us shaks ne puch k "aap school jatay ho" to us bachay ne haan me jawab deya. Us shaks ne phir agla sawal keya k "kis class mein parhte ho?" jis per bachay ne kaha k "nahi uncle parhnay nahi jata, maa chanay bana deti hai woh school k bachon ko farokht karta hon, bohat saaray bachay mujh se chanay kharidtay hain, hamara yahi kaam hai, ise se ghar chalta hai ab hamara".


Bachay ka aik aik lafz hamari rooh ko paash paash kardany k liye kafi hai. Ba-hasiyat-e-Muslman hamary is Islami mashray me aesy mazloom aur be'bas logon ka hona hamary liye ALLAH ke bargarh me sharmandgi ka bais hai, hamain in ke zada se zada madad karna chahye. 

Us shaks ne mazeed pucha k "tumhara koi rishtay'daar hai". Bachay ne jawab dia k "pata nahi, maa kehti hai ghareeb ka koi rishtay'daar nahi hota, maa jhoot nahi bolti, par uncle, mujhe lagta hai meri maa kabhi kabhi jhoot bolti hai, jab hum khana khatay hain hamein dekhatii rehti hai, jab kehta hon k maa aap bhi khao, to kehti hai mein nay kha liya tha, is waqt lagta hai jhoot bolti hai".

Us ajnabi ne bachay se pucha k "beta agar tumharay ghar ka kharch mil jaye to parhai karo gy? Bachay ne foran jawab dia k "bilkul nahi, kyun k taleem haasil karne walay ghareebon se nafrat karty hain. Uncle, hamein kisi parhay huay nay kabhi nahi poocha, paas se guzar jatay hain bas."

Ajnabi heran bhi tha aur pareshan bhi.

Phir is nay kaha "har roz isi masjid mein aata hon, kabhi kisi nay nahi poocha, yahan tamam anay walay mere waalid ko jantay they magar hamein koi nahi jaanta". Bacha zor zor se ronay laga "Uncle jab baap mar jata hai to sab ajnabi kyun ho jatay hain?"

Bachay k is sawal ka koi jawab shayed kesi  k pas bhi naa ho. Aisay kitney masoom hon gy jo hasratoon se zakhmi hain bas aik koshish kijiye aur apny ird gird aisay zaroorat mand yateemon, be'saharaon ko dhundain aur un ki madad karain

Mashray me asal tabdeeli ise se aani hai naa k naray lagany se.

BEACON HOUSE SCHOOL KA MISSION


Kya ye mumkin hai kay koi school kisi riyasat ko shikast de day?

Beacon house ka naam sab se pehlay social media par tab gardish mein aaya jab wahan mojood talebaat ne apne khoon alooda paidz aur zair jaamay dewaron par chaspan kar kay apni azaadi ka muzahira kiya.

Phir wahan talba-o-talebaat ki makhloot dance mehfilon ki tasaveer social media ki zeenat banin.

Phir wahan parhaye jaany walay nesaabi kutub ke screen shots share huen jin mein Pakistan kay aisay naqshay they jahan maqboza aur Azad Kashmir k ilawa Gilgit Baltistan ko bhi India ka hissa dekhaya gaya tha aur un kitabon mein un ko "Indian states" likha gaya tha. Aur yeh maamla kisi aik kitaab taq mehdood nahi tha balkay taqreeban tamam classes ki tamam kitabon mein they jin k khilaaf social media hat'ta k supreme court kay eh'kamaat bhi be assar saabit huay.

Beacon house k khilaaf social media par aawaz uthany walay Beacon house k sabiq mulazim Armaghan Haleem sahib ko is qisam kay mawaad kay khilaaf aawaz uthany per zad-o-kob keya gaya aur qatal taq ki dhamkiyan milein.

Beacon house aur is k zeli idaray "The Educator" mein Indian sarmaya kaari ka inkishaaf hua. 1996 mein in schoolon mein world bank k zeli idaray "International Finance Group" ne kayi million dollar ki sarmaya-kari ki.

Beacon house Pakistan ka sab se mehanga school hai. Aik andazay kay mutabiq Beacon house mahana 5 se 6 Arab aur salana 60 se 70 arab rupiya Pakistanio se loot'ta hai.

Yeh Pakistan k sabiq wazeer-e-kharja Khurshid Mohammad Qasuri ki begum Nasrin Qasuri ki malkiat hai jin ko un ka beta Qasim Qasuri chalata hai. Yeh khandan is taleemi idaray ki badolat kharbon ka malik ban chuka hai.

Khurshid Mohammad Qasuri wohi sahib hain jis ne pandarween (15) aaeni tarmeem (shia bill) kay khilaaf ehtijajan istifa diya tha. (shayed Islam se nafrat is pooray khandan k khoon mein shaamil hai)

Liberalism ka alambardar Beacon house har saal Pakistani idaron mein apny tarbiyat yaafta kam-az-kam 4 laakh talba ghussa raha hai. Yeh talba Pakistan kay Alla tareen tabqaat se talluq rakhtay hain jin mein sarkari idaron k barray barray bureaucrats, sahafi, sayasatdan, businessman aur vaderay shaamil hain.

Pakistani muashray mein in talba ki aksariyat taqreeban laa-Deen hai. Woh un tamam nazariyaat aur afkaar ka mazaaq uratay nazar aatay hain jin par nah sirf hamara muashra khara hai balkay jin ki bunyaad par Pakistan banaya gaya tha. Had yeh hai k in talba ki aksariyat ko urdu se bhi taqreeban door rakha jata hai (jo Islam kay baad Pakistan ko jore rakhnay wala dosra ahem tareen juz hai).

Pakistan k alla tareen tabqay se talluq rakhnay walay in talba ki aksariyat bari taizi se Pakistan mein ahem tareen positions sambhaal rahi hai. Isi tabqay ka aik bara hissa fouj mein bhi ja raha hai jo zahir hai wahan sipahi bharti honay k liye nahi jata.

Agar Beacon house isi raftaar se kaam karta raha to anay walay paanch (5) se das (10) saloon mein Pakistan aik liberal riyasat ban chuka hoga jis k baad is k wujood ko tootnay se koi nahi rok sakay ga.

Mashhoor zamana girftar shuda maloon Ayaz Nizami k alfaaz shayed aap ko yaad hon k:

"Hum ne tumhare colleges aur universities mein apny Professors aur lecturers ghussa diye hain. Jo tumhari nai nasal k un tamam nazariaat ko tabah-o-barbaad kar deingay jin par tum logon ka wujood khara hai. Inhen Pakistan ki nisbat Pakistan k dushman ziyada sachey lagen gy. Woh jurrat-e-izhaar aur roshan khayaali k zem mein tumhari poori tareekh radd krdaingy. Inhen India faateh aur tum maftoh lagu gy. Inhen tumhary dushman hero aur khud tum villain nazar aaogay. Inhen nazariya-e-Pakistan khurafaat lagey ga. Islami nizaam aik daqiya'noos naara lagey ga aur woh tumhary buzurgon ko ahmaq jaanen gy. Woh tumhare Rasool ﷺ par bhi badgumaan hojayingy hat'ta k tumhare Khuda par bhi shak karne lagen gy."

Beacon house ne "taleem" k unwan se Pakistan k khilaaf jo jung chair rakhi hai is ko roknay mein media aur supreme court dono nakaam nazar arhay hain. Is ko ab awam hi zanjeer daal saktay hain. Yeh kaam hum sab ne mil kar karna hai. Bethar hoa k parents sakhti se is baat ka notice len aur apnay bachon se zarur pucha karain k unhain school me kia sikhaya gaya hai, aur agar wo naa batayen tab bhi aap ke zimadari hai k apny bachon k hawaly se malumaat hasil kartay rahen, un k nazariyaat ko parakhtay rahain.