Thursday, 31 October 2019

HUM MUSALMAN YA KAFIR

Din raat hum kafiron ko TV program may dekhtay rehtay hain un kay dramay films dekhna to koi buri baat he nhe hamaray nazdeek. Apnay bachon ko bhi saat betha kar dekhatay hain, kia hum nay kabhi socha hai kay hamaray bachon per un kay deye jaanay walay nazariyaat ka kia asar paray ga, bachay apnay mazhab k mutaliq sawal uthana shuru ho gaye hain aur un sawalaat ka jawab dena aap k bas ki baat nhe, phir wo net per search kartay hain aur wahan bhi kafiron kay mazeed sawalaat ka samna karna parta hai, hum log apnay bachon ko khud Deen say door kiye jaa rahay hain.

Un kay dil may uthnay walay sawalaat ka aakhir kon jawab de gaa? Deen daaron say to pehlay he aap door rakhtay hain, Deen phelanay walaon say aap ko nafrat hai, aap kay nazdeek wo bachon ko gumrah kar detay hain. Phir hidayat kia hai? Quran aur Hadees agar khud say parhain gy to gumrah hojayen gy (inna lillahi wa inna ilayhi rajioon) aesi jahilaana soch kay hum malik ho chukay hain.

Apni garibaan may aik baar jhank kar dekhain kay kahen aap kafiron ki kee gaye brain washing ka shikaar to nhe hochukay, agar ho chukay hain to km-az-km apnay bachon ko to un kay shar say bachayen, unhain to Deen ki taraf lagayen, unhain to Deen sikhayen.

Kafiron ki terha aazadana zindagi roz roz dekha kar aap nay apnay bachon ko khud Deen say door kar deya hai phir wo aap ki izat kyun karengay, wo aap say tameez say kyun baat karengay, wo aap kay haqooq ka kyun khayal rakhain gy. Ye saray kaam to unhain Deen ne sikhanay thay, aur aap ne to pehlay he unhain Deen say door kar rakha.

Ab to betay apni marzi say shadi karengay, aur betiyan jhoot bol kar gharon say nikal jaya karengi. Is ka zimadar kon hai, yaqeenan aap khud.

Jis Deen nay unhain ikhlaaq sikhana tha wo to almaari may band para hai aur aap chalay hain farmabardaar naik aulaad bananay.

Tuesday, 29 October 2019

SAFAAI NIFS EMAAN HAI

Agar Insaan kay dil may kesi kay liye bugz naa ho, wo kesi say nafrat naa karta karay, koi laalach ya hawas naa ho aur dil har qism ki gandagi say paak ho to aesa dil aadhay Emaan say bhar jaata hai, dil ka saaf hona nifs Emaan hai.

Hamaray dil may har kesi k liye koi na koi feelings hoti hain, sab kay baaray may aik jesa nhe sochtay. Agar koi aap kay saat bura karay to us kay liye nafrat aur jo acha karay to us kay gurvidah hojatay hain. Ye dohraa meyaar he asal may hamari shaksiyat ko wazay karta hai kay hum achon kay saat kitnay achay aur buron kay saat kitnay buray hain.

Agar hum apnay sat bhalai karnay walon k saat bhi adal-o-insaaf wala mam'laa karain aur unhain najaiz support naa karain aur na he un ki koi najaiz khuwaish ko qabool karain to ye hamari saadgi aur hamari shaksiyat ki usool pasandi ko wazay karta hai.

Ise terha hum apnay saat bura karnay walon k saat bhi bhalai karain, un kay saat adal-o-insaaf wala mam'laa karain to ye hamari shaksiyat ki aajzi, hamari taqat aur bardash ko zahir karta hai.

Lakin hamara haal ye hai kay koi bhala karay to us kay qadmon may gir partay hain aur agar koi bura karay to sari zindagi usay gaaliyan dety dety nhe thaktay. Shaksiyat ka ye pehloo hamari kambakhtii ko zahir karta hai k hum kitnay baray khudgerz aur khud pasand insaan hain. Aur darasal yehi hamari sb say bari kamzoori hai jo hamain har lehaaz say tabah kar rahi hai.

Sunday, 27 October 2019

NAZARIYAAT KI JANG

Sb Apnay Nazariye Pass Rakho
Hum Apna Nazariya Rakhtay Hain



Kesi mulk ka nazariya jaan'na hoto us mulk kay qawaneen ko dekho. Aik Islami mulk kay nazariyaat bhi Islami hotay hain, jin ki pechaan nafiz huay way qawaneen say hoti hai, per hamray mulk ki badqismati ye hai kay sirf naam ka Islami mulk hai, naa to yahan kay qawaneen Islami hain aur naa mahool.


Is mulk may aap ko aesy logon ki fouj milay gi jo Islami nazariyaat ko thokar martay rehtay hain dusron kay nazariyaat ko Islam me dakhil karnay ki kosheh kartay rehtay hain.

Islam may zindagi guzarnay kay tamam rehnuma usool mojood hain, kyun kay dusray is hawalay say kanglay hain is liye jis ko dekho tanqeed karta nazar aaye ga aur Islam ki har baat se ikhtalaf karay ga, is kay bar'aks apna nazariya paish karay ga, jis may koi wazan nhe.

Thursday, 24 October 2019

NASIYAT KARNAY WALA DOST

Nasiyat karnay wala aap kay saat mukhlis hai jabhi aap ko nasiyat karta hai, chand jahil log media per aakar ajeeb baat kartay hain kay aap kay saat wohi mukhlis hai jo aap ki har baat may aap ka saat day. Bhala wo shaks kesay aap say mukhlis ho sakta hai jo aap ko sahi galat na samjhata ho jo aap ko ye naa batata ho kay kia sahi hai aur kia galat.

Kuch log to is say bhi aagay ki jahilaana baat kartay hain kay jo aap ko zindagi enjoy karna sikhaye wo aap ka bethreen dost hai.

Lakin yaad rakhain dost aap ka wohi hai jo aap ko sahi raasta dekhaye, jo is zindagi ka maqsaad samjhaye, jo aap ko bataye kay kon sa raasta durust hai aur kon sa raasta aap ko halaak karday ga.

Waqt barbad karnay walay dosto say bachain un say aap ko kuch faida nhe milna sirf afsos karangay kay apni zindagi ka bohat sa waqt kuch sikhnay kay bajaye sirf doston kay saat baaton may barbad kartay rahay.

App kay achay parhay likhay samajhdaar dost he aap kay bethreen mustaqbil ki zamanat hain.

Wednesday, 23 October 2019

ISLAM AIK MAZHAB YA DEEN


Islam aik mazhab ya Deen?
Badqismati say hum wo Musalman han jinhonay Islam ko batoor-e-Mazhab qabool keya hai. Halan'kay Islam aik mukammal Deen hai jis mai zindagi guzarnay kay liye tamam rehnuma usool mojood hain. Mazhab to Islam ka aik hissa hai. ALLAH ne bhi Musalmanon ko Islam may pura pura dakhil honay ka hukum deya hai. Aur hamaray NABI Alay Salam ne bhi to apni zindagi ko Islam kay tariqay kay mutabiq guzara. Aik mukammal Islami nizaam deya gaya hai. HAr shaks ki inferaadi zindagi say ly kar ijtamaai mamlaat tak rehnumai Islam may mojood hai.
Phir kyun hum kharafaat may doobay huay hain.
Islam aik complete system hai magar yahan in baton per koi tawajja nhe deta. Aik aam insaan bhi apni zindagi may Islam ko sirf Namaz Rozay tak ahymeyat deta hai baqi mamlaat may usay koi dilchspi nhe hai.
Jis Musalman ki zindagi ka uthna bethna bhi Islam kay mutabiq hona chahye tha aaj wo khud Islam per chalnay walon ko bura bhala kehta hai. Koi daarhi wala shaks bura kam karta nazar aaye to sab molviyon ki shamat aajati hai sb ko gali de jaati hai, aakhir kyun? Aik begair daari wala bhi to chori karta hua pakra jaata hai phir do apnay aap ko bhi gali kaho khud ko bhi chor, kyun yahan farq hogaya?

Sunday, 20 October 2019

PARDAH DURUST KARAIN

Meri apni Musalman behnon say dardmandana darkhwast hai kay pardah ko pardah he rehnay den usay apni khwahisaat aur fashion ki bheet mat charhayen. Apnay Islami waqar ko qaim rakhain saadgi ko apnayen, saadgi Imaan ka hissa hai. 

Fashion se izzat nahi milti balkay ALLAH izzat deta hai. Apni niyaton ko theek karlain, dheelay dhaalay aur saada hijaab aur burkay ko istemaal karain, ALLAH ki raza-o-kushnodi ko paish-e-nazar rakhain, ALLAH ka hukum poora karnay kay liye Deen kay ehkamaat ka mazaaq nah urayen. 

Yeh char(4) din ki zindagi apni khwahishaat ko poora karnay kay liye nahi mili the. Yeh zindagei aik imtehaan hay, azmaish hay k kon aakhrat ki behtareen tayari karnay wala hai. Kon apnay rab ki raza aur khushee ko ahmiyat deta hai aur kon apni nafsaani khwahisaat kay peechay andha dhund bhaghta hai. 

Hum bohat khobsorat nazar aahi gay to kia, fashion ki daud may sab se agay nikal bhi gay to kia, hum logon ki nazron may bohat jaj bhi gay to kia, agar yeh sab kuch hamein mil bhi gaya to kia, aakhit to mout he hai. Mout kay sath he har cheez ka khtama ho jana hai, duniya ki shohrat izzat khubsoorti sab kuch khatam hojaye ga aur aakhir'kaar insaan akeela he aik din apni qabar may jaa sooye ga apnay aamaal ka boojh lekar. Jahan siwaye apni nakiyon kay kuch kaam nahi aanay wala hai. Aqal mand woh hai jo marnay se pehlay mout ki tayyari karlay. 

ALLAH nay jannat bohat khubsoorat banai hai apnay farmabardar bandon aur bandiyon kay liye. Wahan woh woh naimatain hain jo nah kisi aankh nay kabhi dekhein nah kisi kaan nay sunien, nah kisi dil par unka khayaal bhi guzraa. 

Aaj duniya may ALLAH ki marzi ki zindagi guzarlen, kal ko aakhrat may apni mann chahi zindagi guzar liye ga. 

ALLAH hamari maa behnon ko parday kay haqeeqi taqazon par amal karnay ki tofeeq ataa farmaye.

Aakhri baat yad rakhiye kay aakhir mard aurat ko pardah ki talqeen kyun karta rehta hai, lazmi se baat hai jo aap ki izzat karta hai aur jo aap ki izzat ki hifazat chahta hai wo zarur aap ko pardah ka kahay ga. Jis ki niyat kharab hai aur jo aap ki izzat say khelna chahta hai wo lazmi aurat ko nanga karnay wali baaton ko defend karay ga.

Friday, 18 October 2019

ENGINEERS KO BADNAAM KARNAY KI SAAZISH

Engineers kesi bhi mulk ka bohat bara sarmaya hotay hain aur Engineering field may mahir log he kesi mulk ki technology ko barha kar usay powerful country bana saktay hain, lakin badqismati say jab engineers he nhe hongay aur koi engineering field ki taraf aana pasand nhe karay ga to phir koi mulk tarakki kesy karay ga.

Mulk-e-Pakistan may jis terha say engineering field ko badnaam kiya jaata hai aur videos bana kar youtube aur social media per daali jaati hain, is say nojawan mutassir ho kar engineering field say door bhag rahay hain. Un kay nazdeek engineer berozgaar phir rahay hain.

Degar fields say taluq rakhnay walay log kon sa 2 2 jobs liye phir rahay hain ya un ka companies intezaar kar rahi hain, wahan bhi same situation hai, wo bhi khuwaar hotay hain nokari kay liye. Magar badnaam sirf engineering field he hai.

Yaad rakhain agar hum technology may aagay na barhay to kabhi bhi apnay dushmanon ka mulabla nhe kar saktay. Technology may agar aagay barhna hai to engineering ko galat nhe samajhna hai.

Wednesday, 16 October 2019

LOCAL ANGRAIZ

Hamari quam may aesay logon ki kami nahi jo angraizon ko kamiyab samajhtay hain aur har baat may unhi ki misaalain detay hain, aksar log to un kay culture say mutassir ho kar unhain follow tak kartay hain, un kay dress, faishon hatta kay un ki zuban ko apnaya hua hai aur fakhar mehsoos kartay hain, in logon say pucha jaaye kay aakhir kyun un say itna mutassir ho, to is ka koi dhang ka jawab is qaum kay un logon kay pass nhe hoga.

Jab apni he chezon ki qadar karna chor dengay to phir apni is aehsas-e-kamtari per he fakhar mehsoos karangay jahil log. Aur wo angraiz aap ko haqeer aur kamtar he samajhtay rahengay kyun kay aap khud say un kay nokar banay huay hain aap ka apna kuch nhe aap ki apni koi value nhe un ki nazar may.

Phir aap chahay duniya bhar may jaa kar apni qaum kay liye kitna he shor machatay rahen duniya kay baray baray platform per jaa kar apni awaz uthayen, koi aap ki baaton ko ahymeyat nhe de ga, kyun kay aap un ki nazar me kamzoor aur be'maaini chez hain.

Jo quam apni salaahiyaton per tarakki na karsakay aur dusron kay culture say mutassir ho wo sirf duniya may zaleel-o-khuwaar hosakti hai.

Najaanay hum kyun zehni ghulami ka shikaar hain kay hum un kay bagair tarakki nhe karsaktay. Apni chezon ko apna kar to dekho tarakki kar kay un say bhi aagay nikar jao gy.

Duniya may jitni bhi tarakki'yafta qaumain hain China, Germany, Turkey, India, America ye sab apnay bal bootay per khari hui hain, sab ki apni kitabain, apna research work, apnay scientist, aur apna culture mojood hai.

Hamaray pass to apna pura Deen-e-Islam mojood hai jis may har field kay hawalay say rehnumai mojood hai magar afsos ye hai kay ye jahil quam parhti he nhe ye shakespeare ko to parhti hai per QURAN parhnay ka is kay pass waqt nhe kitnay afsos ki baat hai ye hamaray liye.

Mukhtasir ye kay aaj duniya bhar may hum jo zaleel hain aur koi hamari nhe sunta us ki wajah sirf itni si hai kay hum khud apnay ALLAH ki nhe suntay is liye us ki makhlook hamari nhe sunti.

Monday, 14 October 2019

AYASHI

Ameer ameer se ameer'ter hota jaraha hai aur gareeb gareeb se gareeb'ter. Hamara koi haal nhe yahan aik taraf zarurat naa hotay huay bhi ghar ka har fard sirf apni fazool ki khowaishon ko pura karnay kay liye nokari karta hai. To dusri taraf ghar ka aik kamanay wala bhi berozgaar phirta hai.

Beshumar larkiyan sirf carrier bananay kay chakar may dusron ka haq maar rahi hain, un ki jagahon per qabza kar kay bethi hui hain aur zarurat mand becharay berozgaar phir rahay hain markets me job he nhe hain aur aye din larkiyon ka koota barhaye chalay jaarahay hain. Ye larkiyan kama kar kon sa apnay ghar ka bojh utha'ti hain balkay sara paisa sirf apnay faishon aur kapron me ura deti hain, in ki shah kharchiyon aur ayashiyon ka to koi andazaa he nhe, in jahil aurton ko koi samjhaye kay is shah kharchiyon ka qayamat kay din jawab dena hoga.

Saadgi to khatam hogai hai is qaum may aur fazool kharchi to koi aam baat hai, log sirf paisa jama karna jaantay hain aur ye kehtay hain kay ye paisa hum apnay mushkil waqt kay liye jama kar kay rakh rahay hain, ab zara koi ye samjhaye kay jab aap khud he chahtay hain kay aap per koi bura waqt aaye aur ye paisa us per istemaal ho to phir jab bura waqt aata hai to ALLAH say shikwaa kyun? Aap nay to paisa he ise din kay liye jama kar kay rakha tha. ALLAH nay kaha kay paisa gareebon per kharch karo, is say to tmhari bimariyan aur parishaniyan khatam honi then, mushkil waqt ko tal jana tha to ulta paisa jama kar kay mushkil waqt ko khud he dawat detay hain aur phir baad may ALLAH say shikwa kartay hain.

ALLAH he hamain aqual day werna khud say samajhnay kay liye to hum tiyaar he nhe hain. Har koi bas sirf apnay baaray may sochta hai Muslim ummat kay baray may aur dusron kay baray may sochnay ka kesi kay paas koi waqt nhe.

Saturday, 12 October 2019

ASAL MUJRIM KON

Naa to hatiyaar Musalmanon ne banaye aur naa he Musalman is duniya me pehla insaan hai jis ne kesi ko qatal keya ho. Haqeeqat to ye hai kay zadater hatiyaar Musalmanon kay khilaaf istemaal huay, phir Musalman deshatgard kyun?

Musalman jab bhi laray apnay difa may laray jehaad aur jung may yehi buniyadi farq hai kay jehaad hamesha apnay difa may lara jaata hai.

Aaj kay dour ki jahil awaam brain washing ka shikaar hochuki hai isay ye nazar nhe aata kay zalim kon hai aur mazloom kon, media nay aesa pagal banaya hai kay khud apnay he Musalman bhayon ko deshatgard kehna shuru kardia hai.

Jo Musalman bhai apni maa behen aur bachon ko bachanay may apni jaanayen day rahay hain wohi asal mazloom hain. Jab kay Musalmanon per tootnay walay dajjal kay pujaari jin kay pass killing license mojood hai aur wo jisay chahen qatal kar kay usay deshatgard qarar de den, asal mujrim to yehi zalim log hain.

Thursday, 10 October 2019

FAISHON KAY NAAM PER BEHOODGI

Faishon kay naam per behooda kapron ki har taraf bharmaar hai. Kesi ko is baat ki parwa nhe kay kon sa libaas pehan'na munasib aur kon sa ger'munasib hai. Log is qism ki baaton may dilchspi he nhe lena chahtay. Lakin yahan sawal ye paida hota hai kay logon ki ye laparwahi un kay haq may bethar hai ya nhe, do(2) chaar(4) tasalli baksh jumlay bol lenay say ya dil ko behla lenay wali batain kar lenay say sachai naa to badal sakti hai aur naa ALLAH ka koi hukum badal sakta hai. Badalna hai to insaan ko badalna hai, apnay aap say jhoot bol kar khud ko bachaya nhe jaasakta.

Faishon ka Islam say koi taluq nhe aur jo koi faishon ko Islam say jornay ki kosheh karta hai wo Islam ki taraf jhooti baat ko mansoob kar raha hai. Is ka anjaam kia hoga ye usay pata hona chahye

Islam nay jis qism kay libaas ko mard aur aurat kay liye chuna hai sirf wohi libaas pehan'na aik Musalman kay haq me bethar hai. School may bacha agar school ka uniform pehen kar naa jaye to school walay usay gate say ander dakhil nhe honay detay, school ka qanoon itna sakht hai, aap nay qayamat ko aur ALLAH kay qanoon ko kia mazaq samajh rakha hai. Apni marzi chala kar usay Islam ki taraf thopnay ki kosheh na karain hisaab kitaab ka din koi mazaq nhe hai, itnay NABI duniya may aye unhone takleefain jhelein, kia ye sb koi mazaq horaha hai jo aap apni marzi ki zindagi guzarain, apni marzi ka faishon karain aur aakhrat mai bhi aaram say bakshay jayen aur jannat may chalay jayen.

Hamain sochna hoga kay aakhir hum apnay saat mukhlis hain ya nhe agar waqai hum apni aakhrat kay hawalay say laparwah hain to jaan len anjaam bohat bura honay wala hai aur agar hamain parwah hai to phir Islam ko samajhna hoga ALLAH kay utaaray huay aehkamaat per amal karna hoga, ise may hamari nijaat hai.

Tuesday, 8 October 2019

ASAL JAHIL KON?

Aik mashoor ice cream walay kay pas main apni begum kay saat betha ice cream kha raha tha. Begum sahiba ki ice cream khatam hui to unhone dabba road ki taraf phenk dia, pass he koora daan rakha hua tha. Maine aitraazan kaha kay jb koora daan mojood hai to phir kachra road per phenknay ki kia zarurat hai, jis per unhone hans kar koora daan ki taraf mojood kachra uthanay waly ki tarf ishara kar kay kaha kay jab ye jahil kachra uthanay walay mojood hain to phir kachra kooran daan me khud phenknay ki kia zarurat hai. Begum ki ye baat sun kar may ye kehnay per majboor hogaya kay hum jesay parhay likhon ko agar apnay hissay ka koora phenknay kay liye bhi agar kesi jahil ki zarurat hai to phir hum se bethar to ye jahil he huay kay hum parh likh lenay kay bawajood bhi un kay mohtaaj hain.

Hamari begum ko bhala hamari ye baat kesay hazam honi the, unhone hamaray haat se bhi ice cream ka dabba cheena aur road per phenk dia.

Sunday, 6 October 2019

MURDAH QAUM


Itnay barray shehar may Fajar ki Azaan kahin bhi sunai nah de gai har taraf dhuwan uth raha tha kahin aag kay sholay uth rahay thay, har taraf sannata tha. Sarkain galiyan bilkul veraan then sarrak par kahin ikka dukka laashen pari huen then jis ki antariyan bahir ko nikli hui hotein, kisi ka sir gaib hota, kahin kisi aurat ki burhana laash pari hoti aur kahin koi aurat sisak rahi hoti aur jism par daanton aur khoron kay be’rehemana nishanaat hotay, kahin bachay zibah keye paray hotay, kahin no'moluod bachay maa'o ko pukaar rahay hotay. Abhi subah sadiq honay ko the k Philistine ki veraan sarrak par kuch bakhtar’band gariyan namodaar huien jo laashon ko kuchaltay huay sarak ko naya surkh rang de rahi then kay achanak aik pakki imarat kay samnay gariyaan ruken aur fouji nojawan gariyon se utar kar imarat may ghusnay ki kamyaab koshish karnay lagay jis may kamyabi in ka muqaddar bani imarat se firing ki aawazian sunai denay lagein kuch der baad laashon ka ambaar lag gaya Philistine kay nojawan ondhay munh zameen kay bal maray paray thay bachon ko maa'o se juda kar diya gaya tha, maa'o kay pastaan kat deye gaye thay, do khobsorat nojawan larkiyon ko liya gaya tha shayad woh fojion kay kisi kaam aasakten. In ko bandooq ki noke se imarat se bahar laya gaya bari bedardi se gari may bethaya gaya, firing ka shore sun kar na mukammal hujoom jama ho gaya jo mushtael tha aur band gariyon par pathrao karnay laga jin may bachay aur jawan shaamil thay. Aik Israeli fouji nojawan nay himmat kar kay hujoom may se aik 9 saal ka Philistine bacha utha liya aur gaari kay agay baandh diya jis se hujoom nay gariyon per pathrao band kar diya. Fouji gariyaan do(2) nojawan larkiyon aur bachon sameit Israel ki jaanib jaati hui nazar aayen jahan sooraj apni kirnian phela raha tha aur hamari izzat nilaam horahi the:
Aur ummat-e-Muslimah abhi taq so rahi the.

Saturday, 5 October 2019

ZIMADARI YA GERZIMADARI

Hum jab kahen nokari kartay hain to sirf apnay boss ya reporting manager ki suntay hain, unhi ki baat hamaray liye sb se zada ahem hoti hai, wo jo kaam ya zimadari den usi kay hum jawab'day hotay hain.

Agar hum apna kaam chor kar apnay kesi saathi (office colleague) ka kaam lay kar beth jayen to kia ye durust hoga, aap kay boss jb aap say apnay diye huay kaamon ki progress puchain gay to kia aap ye jawab dengay kay aap dusron kay kaamon ko seedha karnay may masroof thay is wajah say apna kaam naa karskay yaa thek terha say naa karsakay? Kia ye jawab itmenaan baksh hoga. Aap sirf apnay goals aur objectives kay zimadar hain dusron kay nhe.

Aaj kay dor may badqismati say roshan khayali aur jadeediyat kay naam per jis terha aik aurat apnay kaamon aur ALLAH ki lagai hui zimadariyon say door bhag kar mardon kay kaamon may ghusna shuru hogai hai. Kia kal ko qayamat kay din ye us kay kaam ayen gay, ALLAH jab aurton say un ki zimadari kay baaray may puchain gy to kia wo ye jawab dengi kay wo mardon kay shana-ba-shana chalnay may msroof then aur un say muqabala karnay may msroof then is wajah say apni zimadariyan thek terha say pura nhe kar saken.

Kia aaj ki aurat ko pata bhi hai kay ALLAH ne us ki kia zimadari lagai hai aur qayamat kay din us say kis hawalay say sawalaat hongay. Kia us din wo ALLAH ko kharay ho kar ye jawab day gi kay mardon ko di gai zimadari us ne apni marzi say apnay uper lay li the? Kia itne jurrat hogi ye baat kehnay ki?

Apni zimadariyon ko chor kar aaj aurat jis rah per chal pari hai us say sirf ye mashra bigarta jaa raha hai ghar mai koi bachon ki terbiyat karnay wala nhe unhain Deen sikahanay wala nhe aur yehi wajah hai kay hamara mashra tezi say gumrahi aur kharafaat ki janib barh raha hai. Ye gerzimadari ka muzahira mashray ko sirf gumrahi ke taraf ly kar jaraha hai hatta kay Musalman nojawan Deen say bhagna shuru hogaye hain unhain Deen bojh aur duniya dari achi lagti hai, Tilawat-e-Quran sunnay ka shok nhe aur ghanton music suntay rehtay hain. Movies dekhnay ka to waqt hai per Deen samajhnay ka waqt nhe. 500 ka burger to kha saktay hain per 50 rupay kesi gareeb ko nhe day saktay. Sabar khatam hota jaaraha hai, bardash khatam horahi hai, khas tor per mardon mai aur phir aurat per wo zulm kartay hain jab terbiyat karnay wali maayen he apnay gharon me nhe hongi to aik mard ko aurat ki izzat karna kon sikhaye ga.

Jab mard aur aurat ALLAH ki lagai hui apni apni zimadariyon say door bhagen gy to natija yehi hoga jo aaj hamaray mashray ka hai, jahalaat jahalaat aur sirf jahalaat.

Thursday, 3 October 2019

INSAAN KI BEHASI

Sarrak ki aik jaanib gira hua aik motor cycle sawar jis ko kuch chotain bhi aayen then. Meri gaari ka guzar bhi wahan se hua, wo bechara kesi car walay say takra kar gira tha lakin afsos is baat ka kay car wala aadmi motor cycle sawar ki taraf dekhnay ki bajaye apni car ki fikar may tha.

Insaan kitna behis hochuka hai is baat ka andaza is say lagaya jaa sakta hai, lakin afsos kay yahan koi islah karnay wala nhe koi samjhanay wala nhe, ye level hai hamara aur ye standard hai hamari quam ka.

Ye khudgerzi darasal un logon ki pehlai hui hai jo har waqt insaan ko bas yehi dars detay rehtay hain kay apnay baray me socho, apni khushi ka socho, apni marzi kay malik bano.

Jee han mera ishara inhe logon ki taraf hai jo filmon dramon aur social media kay zariye se insaan ko sirf behkaatay rehtay hain, jo chahtay hain kay insaan apnay buzurgon say nasiyat hasil karnay ki bajaye ghud galti kar kay sikhay, in ka sara maqsad aik insaan ko sirf us kay apnay baray may sochnay per lagana hai.

Ye sb ise ka natijah hai kay aaj ka insaan kesi ke zindagi ki fikar karnay kay bajaye apnay maal aur dolat ki fikar may laga hua hai.

Tuesday, 1 October 2019

MAHOL KI AEHMIYAT

Mahol jahan insaan ka sab se bara dost hai wahan sab say bara dushman bhi hai. Aaj kal kay maa baap apnay bachon kay ird-gird kay mahol per tawajah nhe detay yehi wajah hai kay bachay baray ho kar maa baap se door hojaatay hain un kay sat bethnay kay bajaye apnay doston may bethna pasand kartay hain.


Gharon Ka Mahol:

Ghar kay mahol ki agar baat ki jaaye to sirf bachay kay khanay peenay aur soonay per sara zoor hota hai us kay baad taleem per, Deen ka to door door tk pata nhe hota, darasal is me maa baap ka bhi koi qasoor nhe wo khud ise mahol ka shikaar ho chukay hotay hain unhain andaza he nhe kay asal zindagi kia hai aur Islam kis qism ki zindagi guzarnay ka dars deta hai. Wo apnay bacho per bhi wohi implement kartay hain jo un per hua hota hai, aur asal haqaiq tk pohuchnay ki kosheh nhe kartay.

Gharon may is had tak brain washing hochuki hoti hai kay film aur drama to roz 3 4 ghantay pabandi se dekha jaata hai per QURAN aik baar bhi khool kar samajhnay ki tofeeq nhe hoti kay ALLAH ne hamain kis qism ki zindagi guzarnay ka hukum dia hai.


Schools Ka Mahol:

Schools may ikhlaaqi terbiyat to di nhe jaati aur naa he bachon ko sharam-o-haya sikhaai jaati hai ulta larkon larkiyon ki aapas me dostiyan kara di jaati hain agar aesay mahol ki hum baat karain to wo sirf bachon ko be-hayai aur waqt se pehlay bohat kuch sikha dayti hain jis ka saboot Lahore Beacon House School ka scandal hai kay jahan chand bachiyan apni panties per khool laga kar usay school ki deewaron per latka kar apni behooda azaadi ka izhaar karti hui nazar aati hain.

Yahan sawal ye paida hota hai kay azaadi kay naam per is terha ki harkat karna unhain kis ne sikhaya aur is qism ki azaadi kar dars unhain kis ne diya?


College/Universities Ka Behooda Mahol:

College aur Universities may aakar to aik insaan ko ikhlaaq kay aala tareen darjay tak pohunch jana chahye tha aur apnay mulk-o-quam ki aik bethreen pechan ban'naa chahye tha, magar afsos kay college aur universities se nikalnay walay bachay apni jahalat ki inteha ko pohunch chukay hotay hain, mazhab say door, duniya parast, paisay kay pechnay bhagnay walay jin ke zindagi ka maqsad sirf-o-sirf apna carrier banana hota hai ya achi se nokari karna, naa kay ALLAH ko razi karna aur naa aakhrat ki fikar karna.

Girlfriend boyfriend walay logon kay nazdeeq mazhaab kesi boring subject se km nhe hota jab gharon me terbiyat aur school life se he brain washing duniya kay husool kay liye horahi ho to universite life me aanay se pehlay he bandah Deen se bezaar hojata hai aur Deen per chalna usay bojhal lagnay lagta hai.


Jo mahol school life ki 3 ya 4 saal ki umar se he roz mil raha ho wo naa sirf aap ko tabah karchuka hai balkay aap ki nasal bhi us say mutasir horahi hai. Yehi wajah hai kay hum Namaz ka tarq karna gunah-e-qabirah to mantay hain per Namaz pabandi se parh nhe paatay, ise terha baqi ebadaa'at bhi. Hatta kay gunahon may bhi mubtala hain aur jaantay bhi hain kay gunah kar rahay hain per chhor nhe paatay kyun kay mahol nhe mila jis ki wajah say terbiyat hoti.

Sirf Emaan ko tabah kardanay wala mahol mila hai aur wohi mahol hum apnay bachon ko day rahay hain aur Deeni mahol say door rakhay huay hain, wo bhi ise mahol ki brain washing ka natijah hai jis ka aap pehlay se hi shikaar hochukay hain.